ट्याक्सी चालकलाई कुटपिट र लुटपाट गर्ने युवक पक्राउ

हाम्रा कुरा

प्रकाशित २०७८ फागुन १६ सोमबार

पोखरा । तनहुँ प्रहरीले ट्याक्सी चालकलाई कुटपिट र लुटपाट गर्ने एक युवकलाई पक्राउ गरेको छ । पक्राउ पर्नेमा तनहुँको व्यास नग।पालिका वडा नं. १० अँधेरी भञ्ज्याङका ३० वर्षीय दुर्गाबहादुर परियार रहेका छन् ।

जिल्ला प्रहरी कार्यालय तनहुँका अनुसार परियारले फागुन १२ गते शुक्लागण्डकी नगरपालिका वडा नं. ४ दुलेगौंडामा ट्याक्सी चालक घनश्याम सिग्देललाई कुटपिट गरी लुटपाट गरेका थिए । घटना पश्चात् उनी पोखरा आएर लुकेर बसेका थिए ।

प्रहरी नायव उपरीक्षक युवराज खड्काका अनुसार परियारलाई पोखरा महानगरपालिका वडा नंं ९ पृथ्वीचोकस्थित जानकी होटलमा लुकेर बसेको अवस्थामा फागुन १३ गते पक्राउ गरिएको हो ।

पक्राउ परेको परियारविरुद्ध आइतबार तनहुँ जिल्ला अदालतबाट सात दिनको म्याद लिएर ज्यान मार्ने उद्योग तथा डाँका चोरी मुद्दा अघि बढाइएको छ ।

परियारले ट्याक्सी रिजर्भ गरी भानु नगरपालिका वडा नं. १२ ओख्ले पुगेर एकान्त स्थानमा लगेर चालकको टाउकोमा ढुङ्गा प्रहार गरेका थिए । त्यसपछि उनले चालकको साथबाट नगद, मोबाइल र ट्याक्सीसमेत लुटेर हिँडेको र सिग्देल परिवारसँग फिरौतीसमेत माग गर्दै आएका थिए ।

डिएसपी खड्काका अनुसार ट्याक्सी खोजतलास गर्ने क्रममा भानु नगरपालिका वडा नं. ६ सिम्पानीस्थित कच्ची सडकमा फेला परेको थियो ।