सिटी प्यालेस होटेलबाट ७ लाख रुपैयाँसहित एक दर्जन जुवाडे पक्राउ

हाम्रा कुरा

प्रकाशित २०७८ फागुन २२ आइतबार

नेपालगञ्ज । जिल्ला प्रहरी बाँकेले नेपालगञ्जको एउटा चर्चित सिटी प्यालेस होटेलबाट करिब ७ लाख रुपैयाँसहित एक दर्जन जुवाडेलाई पक्राउ गरेको छ। नेपालगञ्जको धम्बोझीमा रहेको सिटी प्यालेस होटेलमा ठूलो जुवा भइरहेको विशेष सूचनाका आधारमा जिल्ला प्रहरी बाँकेबाट गएको टोलीले होटेलको कोठामै जुवा खेलिरहेको अवस्थामा ६ लाख ९४ हजार ५ सय रुपैयाँसहित १२ जना जुवाडेहरुलाई पक्राउ गरेको बाँके प्रहरी प्रवक्ता प्रहरी नायब उपरीक्षक मधुसुदन न्यौपानेले जानकारी दिएका छन् ।

प्रवक्ता न्यौपानेका अनुसार प्रहरीको टोलीले होटेलको कोठाभित्र ठूलो रकमसहित जुवा खेलिरहेको अवस्थामा गएराति कैलालीको लम्की ,नेपालगन्ज लगायतका स्थानका जुवाडेहरुलाई ११ बजे पक्राउ गरेको हो । उक्त होटेलमै क्यासिनो रहे पनि नेपाली प्रवेशमा रोक लगाइएका कारण उनीहरु होटेलकै कोठामै जुवा खेलिरहेको भेटिएको न्यौपानेले बताए ।

जुवाखालबाट दर्जनौं प्याकेटका तास, नगद रकम, मोबाइल लगायतका सामग्री बरामद गरिएको हो । पक्राउ परेका जुवाडेहरुसँग जुवा ऐन अन्तर्गत थप अनुसन्धान भइरहेको प्रवक्ता न्यौपानेले जानकारी दिएका छन् ।