काठमाडौं । आईसीसी विश्वकप क्रिकेट लिग डिभिजन–२ अन्तर्गत त्रिकोणात्मक एक दिवसीय श्रृंखलामा पपुवा न्युगिनी (पीएनजी) विरुद्ध नेपालले सनसनीपूर्ण जित हासिल गरेको छ ।
नेपालले २ विकेटको जित हासिल गरेको हो । संयुक्त अरब इमिरेट्स (यूएई) को शारजाह क्रिकेट मैदानमा २०५ रनको लक्ष्य पछ्याउने क्रममा नेपालले ४ बल खेल्न बाँकी छँदै ८ विकेटको क्षतिमा पूरा गर्यो । ४२ रन जोड्दा ४ विकेट गुमाइसकेको नेपालका लागि पाँचौं विकेटका लागि रोहित र आरिफ शेखले १०२ रनको साझेदारी गरे ।
सो क्रममा रोहित ८२ बलमा ५८ रन बनाएर आउट भए । आरिफले ५३ रन बनाए । त्यसपछि भने करण केसीले सनसनीपूर्ण खेल्दै नेपाललाई जिताए ।
उनले २५ बलमा २९ रन बनाए । जसमा २ छक्का सामेल रहेको थियो । आसिफ शेखले १६, विनोद भण्डारीले १२, दिपेन्द्र सिंह ऐरीले ८, सोमपाल कामीले ८, ज्ञानेन्द्र मल्लले ४ तथा कुशल भुर्तेलले १ रनमात्र बनाए ।
यसअघि टस जितेर ब्याटिङमा आएको पीएनजीले निर्धारित ५० ओभरमा ८ विकेट गुमाएर २०४ रनको योगफल खडा गरेको थियो ।
पीएनजीका चार्ल्स एमिनीले सर्वाधिक ५९ रन बनाए । चाड सोपरले ३५, टोनी उराले २७, लेगा सिएकाले २५ र नोर्मन भानुआले २३ रन जोडे ।
नेपालका सोमपाल कामीले तीन विकेट लिँदा कप्तान सन्दीप लामिछाने, आरिफ शेख र ज्ञानेन्द्र मल्लले एक एक विकेट लिए ।
शृंखलाको दोस्रो खेल नेपालले १८ मार्चमा युएईविरुद्ध खेल्नेछ । त्यस्तै, तेस्रो खेल २१ मार्चमा युएईविरुद्ध नै हुनेछ र शृंखलाको अन्तिम खेल २२ मार्चमा पिएजनीविरुद्ध खेल्ने छ ।
नेपाल ९ खेलमा १० अंकसहित छैटौँ स्थानमा छ । नेपालले पाँच खेल जितेको छ भने चार खेल गुमाएको छ । १३ खेल खेलेको पपुवा न्युगिनीले भने अंक खाता खोल्न सकेको छैन ।
त्यस्तै यूएई भने १५ खेलमा १८ अंकसहित दोस्रो स्थानमा भने ओमान २८ खेलमा ३६ अंकका साथ शीर्ष स्थानमा छ । स्कटल्यान्ड १२ खेलमा १६ अंक जोड्दै तेस्रो स्थानमा छ भने नामिबिया र अमेरिका समान १४ अंकसहित चौथो र पाँचौँ स्थानमा छ ।
