पहिला हाम्रा भुरा हिँड्दा जमीन थर्कन्थ्यो । केही समय हामी एक नम्बरको पार्टी बनेर देखाइदियौं । धेरै मानिसहरु हामीलाई हेर्नका लागि लाइन लाग्थे ।
हाम्रो पार्टीका लागि सहयोग गर्ने दानीहरु एकपछि अर्को गर्दै बढ्दै गए र हामीलाई आनन्दमय हुँदै गयो ।
तिनको शरीरबाट नाकलाई सजिलै थाहा दिने अत्तरका बास्नाहरु निकै प्यारो लाग्न थाले । तिनलाई कहिल्यै चित्त दुखाएनौं ।
जो हाम्रा लागि लडेका थिए तिनीहरुको भने पसिना गनाउन थालेर हामीले सल्लाह नै गरेर खाडी–मलेसियातिर जाँदा हुन्छ भनेर पठायौं ।
पछि नेपाल आउन मिल्यो भने हाम्रो लागि थोरै अत्तर किनेर ल्याउन पनि भनेका थियौं ।
तर तिनीहरु आज पनि उतै भेँडा चराउँदै छन् भन्ने कुरा विभिन्न संचार माध्यमबाट हामीलाई पूरै जानकारी छ ।
पहिला–पहिला हामीले मन लागेको मात्रै गर्यौं र त्यसैलाई क्रान्ति भन्यौं । अनि सबैले पत्याइदिए ।
बिस्तारै हामी १ नम्बरको पार्टीलाई ३ नम्बरमा झारिदिए । अनि हामीलाई रीस उठेर ‘नेकप्पा’ बनेर देखाई दियौं ।
त्यतिबेला हाम्रा ठूलेहरु राजनीतिमा नै रहे । केही ठुलेका सन्तानहरु बुर्जुवा शिक्षातिर लागे । सानेका सन्तानहरु अशिक्षित भए ।
हामीलाई नेकप्पा हुँदा पनि अलि धेरै नै हेपाइ भएर अहिले फेरि आफ्नै पार्टी जोगाउंँदै छौं ।
हाम्रा लागि अन्जानमा लडेकाहरुको पसिना मात्र नगन्हाएको भए हामी अझै केही गर्न सक्ने थियौं भन्ने लाग्छ ।
हामीलाई पत्याउनेको झुपडी आज पनि उही हालतमा देख्दा दया लाग्छ । आँशु नै झर्न खोज्दा पनि सम्हालिन्छौँ ।
तिनका आफन्तले हामीलाई नै भोट दिए भने अझै हामी केही गर्न सक्थ्यौं भन्ने हामीलाई छ ।
अझै हार खान हुँदैन । अशिक्षित, बेरोजगारलाई चलायमान गर्न सके केही वर्ष राजनीति गर्नका लागि ठाउँ छ भन्ने लाग्छ । नेपालमा जन्मिएका सीमित भाग्यमानीहरु ।
नजिकैको छिमेकी देश भारतको राजधानी र पञ्जाबमा चुनावी नतिजामा ठूलो परिवर्तन आएको छ ।
त्यहाँ त परिवर्तन सम्भव देखिन्छ । हाम्रोमा परिवर्तन निकै कठिन छ ।
किनकि नेतृत्वमा रहेकाहरुको दम्भ, ऐश आराम, व्यक्तिगत स्वार्थ, गैह्र जिम्मेवारीपन आदि बलियो हुंँदै गएको छ ।
अर्को पक्ष, खुल्किएका, भनेको नमान्ने, अध्ययन नगर्ने, होहल्लाको पछि लाग्ने, भीडबाट समस्या समाधान गर्न खोज्ने, विना परिश्रम राम्रो आय आर्जन खोज्ने सोच भएका जनता देशको अधोगतिका लागि सहयोगीको भूमिकामा छन् ।
नेपालमा रहेका अनगिन्ती राजनीतिक कम्पनीहरु, कसैको पनि भविश्य गतिलो देखिंदैन ।
कम्पनीका कर्मचारीहरुको भने भविश्य राम्रै देखिन्छ ।
