काठमाडौं । आईसीसी क्रिकेट विश्वकप लिग २ अन्तर्गतको त्रिकोणात्मक एक दिवसीय श्रृंखलाको अन्तिम खेलमा नेपालले पपुवा न्युगिनी (पीएनजी) लाई ७ विकेटले पराजित गरेको छ ।
यूएईको दुबई क्रिकेट रंगशालामा भएको खेलमा नेपालले एक सय ७४ रनको चुनौती ३७ ओभरमै ३ विकेटको क्षतिमा पूरा गरेको हो ।
नेपालका लागि आरिफ शेखले सर्वाधिक ५९ रन बनाए । उनले १०२ बलमा अविजित रहँदै ५९ रन बनाएका हुन् ।
कुशल भुर्तेलले ६४ बलमा ५० रन बनाए । त्यस्तै रोहित पौडेलले ४८ बलमा अविजित रहँदै ४४ रन बनाए ।
यसअघि टस जितेर पहिले फिल्डिङ गरेको नेपालले पीएनजीलाई १७३ रनमा रोक्न सफल भयो । पीएनजीले ८ विकेटको क्षतिमा १७३ रन बनायो । कप्तान असाद भालाले सर्वाधिक ४५ रन बनाए ।
नेपालका लागि कप्तान सन्दीप लामिछाने र सोमपाल कामीले २–२ तथा करण केसी, आरिफ शेख, दिपेन्द्र सिंह ऐरी र पवन सर्राफले १–१ विकेट लिए ।
नेपालका लागि भीम सार्कीले डेब्यु गरेका छन् । तर उनले ब्याटिङ भने गर्न सकेनन् । पूर्व कप्तान ज्ञानेन्द्र मल्ल बाहिरिएपछि उनको स्थान भीमले लिएका हुन् ।
नेपालले योसँगै पीएनजीविरुद्ध खेलेका सबै चार एकदिवसीय खेल जितेको छ ।
श्रृंखलामा नेपालले पीएनजीमाथि दुवै खेल जित्दा यूएईसँग दुवै खेल हारेको छ । त्यस्तै यूएईले तीन खेल जित्दा एक खेल पीएनजीले जित्यो ।
योसँगै लिग टुमा नेपाल १२ खेलमा ६ जित निकाल्दै १२ अंक बनाएर तालिकाको छैटौं स्थानमा छ ।
पीएनजीको १६ खेलमा २ अंक छ । शीर्ष स्थानको ओमानले ३६ अंक जोडेको छ । यूएई १८ खेलमा २२ अंकसहित दोस्रो स्थानमा छ ।
