-
-
-
-
काठमाडौं । दिल्ली क्यापिटल्सलाई ६ विकेटले हराउँदै इन्डियन प्रिमियर लिग (आईपीएल) टी–२० क्रिकेटमा लखनउ सुपर जायन्ट्सले जित निकालेको छ ।
बिहीबार दिल्लीले दिएको १५० रनको लक्ष्य लखनउले १९ ओभर ४ बलमा ४ विकेट गुमाएर पूरा गर्यो । लखनउको जितमा क्विन्टन डी ककले सर्वाधिक ८० बनाए । यस्तै कप्तान केएल राहुलले २४ रनको योगदान गरे ।
यसअघि पहिले ब्याटिङ गरेको दिल्लीले २० ओभरमा ३ विकेट गुमाएर १४९ रनको योगफल तयार पारेको थियो । दिल्लीका पृथ्वी शले सर्वाधिक ६१ रन बनाए । यस्तै ऋषव पन्तले ३९ र सर्फराज खानले ३६ रनको योगदान गरे ।
जितसँगै लखनउले ४ खेलबाट ६ अंक जोडेर दोस्रो स्थानमा छ । दिल्ली ३ खेलबाट २ अंक जोडेर सातौं स्थानमा छ ।
कोलकाता नाइट राइडर्स ६ अंकबाटै पहिलो स्थानमा छ । सर्वाधिक सफल मानिएका चेन्नई सुपर किंग्स, मुम्बई इन्डियन्सले भने अंकको खाता खोलेका छैनन् । दुवैले ३ खेल हारेका छन् । सनराइजर्स हैदराबादले दुवै खेल हारेको छ ।
आज पंजाब किंग्स र गुजरात टाइटान्स खेल्दैछन् ।
