कोही घरमा नहुँदा टिकटकले लियो छोरीकाे ज्यान, आमाले हालिन् मुद्दा

हाम्रा कुरा

प्रकाशित २०७९ वैशाख ३१ शनिबार

काठमाडौं । टिकटकले एक १० वर्षीया बालिकालाई एक्लै भएको अवस्थामा चुनौती दिएर ज्यान लिएपछि उनकी आमाले कम्पनीविरुद्ध मुद्दा हालेकी छन् ।

टिकटकले ती बालिकालाई 'ब्ल्याकआउट च्यालेन्ज' खेल खेल्न सुझाएको थियो । यो खेलले मर्ने बेलासम्म सास नफेरेरै रहन सुझाउने गर्छ ।

ती बालिका एक्लै भएका बेला टिकटकले यस्तो खेल सुझाएको र उनले यसो गर्दा अक्सिजनको कमीको कारण उनी बेहोस भएकी थिइन् ।

गत वर्ष डिसेम्बरमा यो घटना भएर ती बालिका बेहोस भएको थाहा पाएपछि बालिकाकी आमा टवाइन्ना एन्डरसनले उनलाई अस्पताल लगेकी थिइन् ।

नायला नाम गरेकी ती बालिका पाँच दिनसम्म अस्पतालमा भर्ना भएपनि पछि उनको मृत्यु भयो ।

टवाइन्ना एन्डरसनले पेन्सिलभेनियाको अदालतमा आफ्नी छोरीको मृत्यु पछाडिको परिस्थितिको जिम्मेवार टिकटकमाथि मुद्दा हालेकी छन् ।

'ब्ल्याकआउट च्यालेन्ज'ले यसरी ज्यान लिने हुँदाहुँदै पनि यो लामो समय देखि प्रसारित छ। यूएस सीडीसीका अनुसार सन् २००८ मा यस्ता ‘चकिङ गेम’ खेल्दा कम्तीमा ८२ युवाको मृत्यु भएको थियो।