शिवसताक्षीमा बसले मोटरसाइकललाई ठक्कर दिँदा एक प्रहरीसहित दुईको घटनास्थलमै मृत्यु

युवराज रेग्मी,

प्रकाशित २०७९ जेठ ११ बुधबार

झापा । झापामा बसले मोटरसाइकललाई ठक्कर दिँदा दुई जनाको मृत्यु भएको छ। झापाको शिवसताक्षीमा बुधबार बिहान भएको दुर्घटनामा प्रदेश नम्बर १ ०२०४० प ७१४९ नम्बरको पल्सर मोटरसाइकलमा सवार दुई जनाको बसको ठक्करबाट घटनास्थलमै मृत्यु भएको प्रहरीले जनाएको छ।

पश्चिमबाट पूर्वतर्फ आउँदै गरेको बसले ठक्कर दिँदा मोटरसाइकलमा सवार दुई जनाको घटनास्थलमै मृत्यु भएको हो । ट्राफिक प्रहरीका अनुसार मृत्यु हुनेमा मोरङ पथरीशनिश्चरे ८ का २६ वर्षीय प्रकाश राई र भोजपुर षडानन्द नगरपालिकाका २६ वर्षीय जितुहाङ राई हुन् ।

बुधबार बिहान को १ ख ७१८७ नम्बरको झुल्केदेवी यातायातको बसले मोटरसाइकलमा सवार उनीहरुलाई ठक्कर दिँदा उनीहरुको घटनास्थलमै मृत्यु भएको हो ।

मृतकमध्ये एक प्रहरी जवान भएको र एक जना भर्खरै स्थानीय निर्वाचनमा खटिएका म्यादी प्रहरी भएको बताइएको छ । हाल बसलाई इलाका प्रहरी कार्यालय झिलझिलेले नियन्त्रणमा लिएको छ।