काठमाडौं । लखनउ सुपर जाइन्ट्सलाई १४ रनले हराउँदै रोयल च्यालेन्जर्स बैंगलोर इन्डियन प्रिमियर लिग (आईपीएल) टी–२० क्रिकेट प्रतियोगिताको क्वालिफायरमा प्रवेश गरेको छ ।
पहिलो सहभागीता जनाएको लखनउ पराजित भएपछि बाहिरिएको छ । अब बैंगलोरले दोस्रो क्वालिफायरमा राजस्थान रोयल्ससँग खेल्नेछ । यसअघि राजस्थान पहिलो क्वालिफायरमा गुजरात टाइटन्ससँग पराजित भएको थियो । गुजरात फाइनल पुगिसकेको छ ।
बुधबार राति कोलकातामा भएको एलिमिनेटरमा बैंगलोरले दिएको २०८ रनको लक्ष्य पछ्याएको लखनउले २० ओभरमा ६ विकेट गुमाएर १९३ रनमात्र बनाउन सक्यो ।
लखनउका कप्तान लोकेश राहुलले सर्वाधिक ७९ रन बनाए । बैंगलोरका जोश हाजलउडले ३ विकेट लिए ।
त्यसअघि टस हारेर पहिले ब्याटिङ गरेको बैंगलोरले २० ओभरमा ४ विकेट गुमाएर २०७ रनको योगफल तयार पारेको थियो ।
बैंगलोरका लागि रजत पटीदरले ५४ बलमा ७ छक्का र १२ चौकाको मद्धतले अविजित रहँदै ११२ रन बनाए ।
दोस्रो क्वालिफायर खेल शुक्रबार अहमदाबादमा राजस्थान र बैंगलोरबीच हुँदैछ ।
