काठमाडौं । विश्वका प्रमुख अर्थतन्त्रहरुको समूह जी२० सम्बन्धी फाइनान्सियल स्टेबिलिटी बोर्ड (एफएसबी) ले क्रिप्टोकरेन्सीका लागि मजबुत विश्वव्यापी कानून ल्याउने घोषणा गरेको छ ।

केही महिनाअघि करिब ७० हजार अमेरिकी डलर पुगेको बिटक्वैन क्रिप्टोकरेन्सीको मूल्यमा लगभग ७० प्रतिशतको गिरावट आएर हालै २० हजार अमेरिकी डलर भन्दा तल झरेको थियो ।

कयौं लगानीकर्ताहरुको पैंसा डुबाउँदै क्रिप्टोकरेन्सीको बजारमा भएको यो ठूलो उथलपुथल पछि सोमबार एफएसबीले आउँदो अक्टोबरमा नयाँ मजबुत विश्वव्यापी नियमहरु प्रस्ताव गर्ने बताएको हो ।

एफएसबीले यसअघिसम्म क्रिप्टोकरेन्सीले प्रणालीगत जोखिम नरहेको भन्दै क्रिप्टो क्षेत्रको निगरानीमा खासै ध्यान दिएको थियो ।

तर क्रिप्टो बजारमा आएको हालैको उथलपुथलले तिनीहरूको अस्थिरता, संरचनात्मक कमजोरीहरू र व्यापक वित्तीय प्रणालीमा बढ्दो लिङ्क रहेको विषयलाई हाइलाइट गरेको छ ।

'बजारमा खेलाडीको असफलता, लगानीकर्ताहरूमा सम्भावित रूपमा ठूलो घाटा र आचरण जोखिमहरूको क्रिस्टलाइजेसनबाट उत्पन्न हुने बजार विश्वासलाई खतरामा पार्नुको अतिरिक्त द्रुत रूपमा क्रिप्टो सम्पत्ति इकोसिस्टमका अन्य भागमा पनि जोखिम सार्न सक्छ,' एफएसबीले जारी गरेको विज्ञप्तीमा भनिएको छ ।

'स्टेबलकोइनहरूलाई भुक्तानीको माध्यमको रूपमा प्रयोग गर्ने हो भने बलियो नियमद्वारा नियन्त्रण गर्नुपर्छ', एफएसबीले भनेको छ ।

'एफएसबीले अक्टोबरमा जी२० अन्तर्गतका अर्थ मन्त्रीहरू र केन्द्रीय बैंक गभर्नरहरूलाई स्टेबलक्वैन र अन्य क्रिप्टो सम्पत्तिहरूमा नियामक र पर्यवेक्षी दृष्टिकोणहरूको बारेमा रिपोर्ट बुझाउनेछ,' एफएसबीले भनेको छ ।

एफएसबी सँग कुनै कानून बनाउने अधिकार छैन तर, यसका सदस्यहरूले यसको नियामक सिद्धान्तहरू आफ्नै क्षेत्राधिकारमा लागू गर्न प्रतिबद्ध छन्।

डिसेन्ट्रलाइज्ड मुद्रा भनेर क्रिप्टाेकरेन्सीहरूकाे प्रचारले बजार बढेपनि यसका किसिमकाे डरलाग्दाे बजार उथलपुथलले नियमन जरूरी हुने संकेत समेत गरेकाे देखिन्छ र, यसै मार्गमा प्रमुख अर्थतन्त्रहरूले कदम चालेका हुन् ।