गुल्मी । गुल्मीको रेसुङ्गा नगरपालिकाले नेपाल नेत्र ज्योति संघ जिल्ला आँखा उपचार केन्द्र तम्घासलाई आँखाको प्रेसर मापन यन्त्र हस्तान्तरण गरेको छ । नेपाल नेत्र ज्योति संघ जिल्ला आँखा उपचार केन्द्र तम्घास गुल्मीको वार्षिक कार्ययोजना बैठकको अवसरमा रेसुङ्गा नगरपालिकाका नगरप्रमुख खिलध्वज पन्थीले उक्त यन्त्र हस्तान्तारण गरेका हुन् ।
यन्त्र हस्तान्तारण गर्दै नगरप्रमुख पन्थीले नगरपालिकाको नीति, कार्यक्रम र बजेटमा नै समावेश गरि जिल्लामा आँखा उपचारलाई शुलभ बनाउने उदेश्य रहेको बताए । । नगरका नागरिकहरुको स्वास्थ्य सबैभन्दा महत्वपूर्ण पक्ष भएको भन्दै नगरप्रमुख पन्थीले भने,“आफ्नो कार्यकालमा यो कार्यक्रमलाई निरन्तरता दिंदै शुलभ स्वास्थ्य उपचार सेवा उपलब्ध गराउन प्रतिबद्ध रहनेछु ।” नागरिकहरुलाई गुणस्तरीय र शुलभ तरिकाले उपचार सेवा प्रदान गर्न पनि नेपाल नेत्र ज्योति संघलाई उनले आग्रह गरे ।
यो यन्त्र खरिदका लागि नगरपालिकाले आ व ०७७–०७८ मा रु १२ लाख विनियोजित गरेका थियो । जसअन्तर्गत रु। ११ लाख १७ हजार ५७० बराबरको आँखाको प्रेसर मापन यन्त्र इ–टेण्डर मार्फत खरिद गरि हस्तान्तरण गरिएको योजना शाखा प्रमुख बिनोद मरासिनीले जानकारी दिए ।
त्यस्तै, रेसुङ्गा नगरपालिका भित्रका आँखाका बिरामीहरुको निःशुल्क शल्यक्रिया गर्नका लागि नगरपालिका र नेपाल नेत्र ज्योति संघ जिल्ला आँखा उपचार केन्द्र बीच सम्झौता गरिएको छ ।
अब नगरभित्रका आँखाको शल्यक्रिया गर्नुपर्ने बिरामीको निःशुल्क उपचार गरिने नगरप्रमुख पन्थीले बताए । “नगरपालिकाले आफ्नो जिम्मेवारी पुरा गर्ने उदेश्यमा एउटा इटा थप्ने काम गरेका छौं”, उनले भने, “निःशुल्क आँखा उपचार सेवाले नेत्र ज्योतिको क्षेत्रमा ठूलो सहयोग पुग्ने अपेक्षा राखेका छौं ।”
