-
-
-
-
काठमाडौं । जिम्बावे विरुद्धको दोस्रो एक दिवसीय क्रिकेटमा भारत विजयी भएको छ । हरारेमा शनिबार भएको खेलमा पाहुना टोली भारतले घरेलु टोलीलाई ५ विकेटले हराएको हो ।
घरेलु टोलीले दिएको १ सय ६२ रनको विजयी लक्ष्य पाहुना टोलीले २५ ओभर ४ बलमा ५ विकेटको क्षतिमा पूरा गर्यो । प्लेयर अफ द म्याच सन्जु सामसनले अविजित रहँदै ३९ बलमा ४३ रन बनाए । उनले ३ क्याचसमेत लिएका थिए । शिखर धवन र शुभमन गिलले समान ३३–३३ रन बनाए ।
यसअघि पहिले ब्याटिङ गरेको जिम्बाबेले ३८ ओभर १ बलमा अलआउट हुँदै १ सय ६१ रन बनाएको थियो । सेन विलियम्सले ४२ तथा रायन बर्लले अविजित ३८ रन बनाए । भारतका शार्दुल ठाकुरले सर्वाधिक ३ विकेट लिए ।
यो जितसँगै भारतले ३ खेलको एक दिवसीय श्रृंखलामा एक खेल अगावै उपाधि जितेको छ । पहिलो खेलमा भारत १० विकेटले विजयी भएको थियो ।
तेस्रो तथा अन्तिम खेल सोमबार हुनेछ ।
