दुई मोटरसाइकल ठोक्किँदा एउटा ट्यांकर मुनि किच्चियो, बाबुछोराको मृत्यु

हाम्रा कुरा

प्रकाशित २०७९ भदौ १५ बुधबार

रुपन्देही । बुटवलको बेलबासमा सवारी दुर्घटना हुँदा दुई जनाको मृत्यु भएको छ । मृत्यु हुनेहरुमा बुटवल उपमहानगरपालिका वडा नं. १३ बेलबासका ४५ वर्षका सोनु भट्टराई र उनका ६ वर्षका छोरा निशान भट्टराई रहेको प्रहरीले जनाएको छ । प्रहरीका अनुसार मृत्यु हुने बाबु-छोरा हुन् ।

दुर्घटनाबाट गम्भीर घाइते भएका दुवै जनालाई लुम्बिनी प्रादेशिक अस्पताल बुटवलमा पुर्याइएको थियो । चिकित्सकले उनीहरुलाई तत्कालै मृत घोषणा गरेको थियो ।

रुपन्देही प्रहरी प्रवक्ता डीएसपी श्याम अर्यालका अनुसार पूर्व पश्चिम राजमार्ग अन्तर्गत बेलबास चोकमा लु४१प ४१६८ नम्बरको मोटरसाइकल र लु ४८ प ३२४६ नम्बरको मोटरसाइकल एकापसमा ठोक्किएर दुर्घटना भएको हो ।

लु ४१ प ४१६८ नम्बरको मोटरसाइकल अर्को मोटरसाइकलसँग ठोक्किएर लु१क ४४२४ नम्बरको ट्याङ्कर मुनि पर्न जाँदा उक्त मोटरसाइकलमा सवार बाबु छोराको मृत्यु भएको हो ।

सो दुर्घटनामा १५ वर्षका आयुष आचार्य र २३ वर्षका अमृत सुनारी मगर घाइते भएका छन् । उनीहरुको लुम्बिनी प्रादेशिक अस्पतालमा उपचार भइरहेको डिएसपी अर्यालले बताए ।