काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले जनताले माओवादी पार्टीको हातमा नै देशको चाबी दिन चाहेको बताएका छन् । बिहीबार राजधानीको एक कार्यक्रममा बोल्दै अध्यक्ष प्रचण्डले देशको राजनीति कता लैजाने भन्ने कुराको फैसला माओवादीले गरोस् भन्ने चाहाना जनताको मन रहेको सुनाए ।
“माओवादी पार्टी जनतामा अहिले स्थानीय तहको निर्वाचनबाट एउटा सन्देश के हो भने, जनता अहिले पनि माओवादी पार्टीको हातमा नै देशको चाबी दिन चाहन्छन् । देशको राजनीति कता लैजाने भन्ने कुराको फैसला माओवादीले गरोस् भन्ने चाहाना छ जनताको भन्ने कुरा प्रष्ट देखिएको छ ।” प्रचण्डले भने ।
अध्यक्ष प्रचण्डले पार्टीले प्रक्रियागत ढंगले खडा गरेको उम्मेदवार केबल व्यक्ति मात्र नभई सिंगो पार्टी हुने बताए । उनले ईमान्दारका साथ मिहिनेत गरे आगामी निर्वाचनमा माओवादीको जितलाई कसैले रोक्न नसक्ने धारणा राखे । माओवादी पार्टी प्रदेश र सङ्घको निर्वाचनमा देशको एक नम्बर कम्यूनिष्ट पार्टी बन्ने आधार मजबुत रहेको उनको दाबी छ ।
