भारतको शानदार क्रिकेट, एक खेलअघि नै जित्यो दक्षिण अफ्रिकालाई
हाम्रा कुरा
प्रकाशित २०७९ असोज १७ सोमबार
1.5k
Shares
काठमाडौं । भारतले दक्षिण अफ्रिका विरुद्धको तीन खेलको टी–२० क्रिकेट श्रृंखला जितेको छ । आइतबार राति भएको दोस्रो टी–२० खेलमा दक्षिण अफ्रिकालाई हराउँदै भारतले एक खेल अगाडि नै श्रृंखला नै जितेको हो ।
गुवाहाटीमा भएको खेलमा भारत १६ रनले विजयी भयो । भारतले दिएको २ सय ३८ रनको लक्ष्य पछ्याएको दक्षिण अफ्रिकाले २० ओभरमा ३ विकेट गुमाएर २ सय २१ रन मात्र बनाउन सक्यो ।
दक्षिण अफ्रीकाका डेभिड मिलरले अविजित रहँदै १ सय ६ रनको शतकीय इनिङ्स खेले पनि टोलीलाई जित दिलाउन सकेनन् ।
यस्तै क्विन्टन डी ककले अविजित रहँदै ६९ रनको अर्धशतकीय इनिङ्स खेल्दा एडिन मार्क्रमले ३३ रन बनाए ।
भारतका अर्शदिप सिंहले २ तथा अक्षर पटेलले १ विकेट लिए ।
त्यसअघि पहिले ब्याटिङ गरेको भारतले २० ओभरमा ३ विकेट गुमाएर २ सय ३७ रन बनाएको थियो । भारतका सूर्यकुमार यादवले २२ बलमा ६१ तथा केएल राहुलले २८ बलमा ५७ रन बनाए ।
विराट कोहलीले २८ बलमा अविजित ४९ रन बनाए । कप्तान रोहित शर्माले ३७ बलमा ४३ रन बनाए । दक्षिण अफ्रीकाका केशव महाराजले २ विकेट लिए ।
