भारतको क्लिनस्विप गर्ने सपना अधुरै, दक्षिण अफ्रिकाको सान्त्वना जित

हाम्रा कुरा

प्रकाशित २०७९ असोज १९ बुधबार

काठमाडौं । दक्षिण अफ्रिकाले भारतविरुद्धको तीन खेलको टी–२० क्रिकेट शृंखलाको अन्तिम खेलमा सान्त्वना जित हासिल गरेको छ । इन्दोरमा भएको खेलमा दक्षिण अफ्रिकाले घरेलु टिमलाई ४९ रनले पराजित गरेको हो ।

योसँगै तीन खेलको श्रृंखला भारतले २–१ ले जितेको छ । शुरुआती दुवै खेल जितेको भारतको क्लिनस्विप गर्ने सपना भने अधुरै रह्यो । खेलमा टस हारेर पहिले ब्याटिङ गरेको दक्षिण अफ्रिकाले ३ विकेटको क्षतिमा दुई सय २७ रन बनायो ।

रिली ररसोले ४८ बलमा अविजित रहँदै ८ छक्का र सात७ चौकाको मद्धतले सय रन बनाए । ओपनर क्विन्टन डी ककले ४३ बलमा ६८ रन बनाए ।

भारतका दीपक चहर र उमेश यादवले एक–एक विकेट लिए ।

जवाफमा भारतले १८.३ ओभरमा अलआउट हुँदै एक सय ७८ रनमात्र बनाउन सक्यो । दिनेश कार्तिकले २१ बलमा ४६ रन जोडे । दीपक चहरले १७ बलमा ३१, ऋषव पन्तले १४ बलमा २७, उमेश यादवले १७ बलमा अविजित रहँदै २० रन बनाए ।

दक्षिण अफ्रिकाका ड्वाइन प्रेटोरियसले तीन विकेट लिए भने वायन पार्नेल, लुंगी एनगिडी र केशव माहाराजले दुई–दुई विकेट लिए । कागिसो रावाडाले एक विकेट लिए ।

रसो प्लेयर अफ द म्याच भए । अन्तिम खेलमा आठ रनमात्र बनाएका सूर्यकुमार यादव प्लेयर अफ द सिरिज भए ।

भारतले पहिलो खेलमा ८ विकेट र दोस्रो खेलमा १६ रनको जित हासिल गरेको थियो ।

अब दुवै टिमले तीन खेलको एक दिवसीय श्रृंखला खेल्नेछन् । पहिलो एक दिवसीय बिहीबार लखनउमा शुरु हुनेछ ।