पोखरा । नवौं राष्ट्रिय खेलकुद प्रतियोगिताअन्तर्गत महिला हक्कीतर्फ आज भएको दोस्रो दिनको पहिलो खेलमा नेपाल आर्मी विजयी भएको छ ।
आज भएको महिला हक्कीको पहिलो खेलमा नेपाल आर्मीले ८-० को गोल अन्तरले मधेस प्रदेशलाई हराएको हो ।
खेलको पहिलो क्वाटरमा आर्मीका तर्फबाट सीतामाया बलले गोल गर्न सफल भएकी थिइन् ।
खेलको सुरुआतीको ५ मिनेटमै बलले गोल गरेकी थिइन् । त्यस्तै खेलको ७ मिनेटमा आर्मीकै तर्फबाट सीमा खड्काले गोल गरेकी थिइन् ।
खेलको दोस्रो क्वाटरमा सीतामाया बलले पुन एक गोल गरिन् । १८ औं मिनेटमा उनले गोल गरेपछि २४ मिनेटमा आर्मीकै तर्फबाट कमला चन्दले पुनः एक गोल गरिन् ।
त्यस्तै तेस्रो क्वाटरमा सीतामाया र सुनिता नेगीले आर्मीका लागि १-१ गोल गर्न सफल भए । ३९ औं मिनेटमा सुनिताले गोल गरेको एक मिनेट लगत्तै सीतामायाले गोल गरेकी थिइन् ।
अन्तिम क्वाटर फाइनलमा आर्मीका तर्फबाट कमला चन्द र सुनिता नेगीले पुन एक-एक गोल गरेका थिए ।
यो सँगै आर्मीले खेल प्रतियोगितामा विजयी शुरुआत गरेको छ । यसपछिको खेल लुम्बिनी र गण्डकी प्रदेशबीच हुँदै छ ।
