बुद्धिचालतर्फको महिला क्लासिकलमा त्रिभुवन आर्मीलाई स्वर्ण

हाम्रा कुरा

प्रकाशित २०७९ असोज ३१ सोमबार

गोरखा । नवौँ राष्ट्रिय खेलकुद प्रतियोगिताअन्तर्गत गोरखामा जारी बुद्धिचाल प्रतियोगितामा महिलातर्फको क्लासिक इभेन्टमा त्रिभुवन आर्मी क्लबले स्वर्ण पदक जितेको छ । प्रतियोगितामा त्रिभुवन आर्मी क्लबकी सुजना लोहनीले क्लासिक चरणमा नौ अङ्क प्राप्त गर्दै स्वर्ण पदक जित्न सफल भएकी हुन् ।

प्रतियोगितामा लोहनीले क्लासिक चरणका सबै नौ खेल सम्पन्न हुँदा सबै खेलमा जित निकाल्न सफल भएको निर्णायक दीपेश गिरीले जानकारी दिए । लोहनीले क्लासिक इभेन्टको पहिलो चरणमा बागमती प्रदेशकी मार्सल तामाङ, दोस्रो चरणमा सशस्त्र प्रहरी बलकी सुरुची थिङ, तेस्रो चरणमा त्रिभुवन आर्मी क्लबकी सिन्दिरा जोशी र चौथो चरणमा प्रदेश नं १ की खुश्बु थापालाई पराजित गरेका थिए ।

यस्तै, क्लासिकल चरणको पाँचौँ चरणको खेलमा लोहनीले प्रदेश नं १ की खेलाडी कृतिसारा अधिकारी, छैटौँ चरणको खेलमा नेपाल पुलिस क्लबकी पूनम प्रसाईँ, सातौँ चरणको खेलमा गण्डकी प्रदेशकी पूजा भण्डारी, आठौँ चरणको खेलमा गैरआवासीय नेपाली सङ्घ (एनआरएनए)की खेलाडी शान्ति धमला र नवौँ चरणमा एनआरएनएकी सुशीला गुरुङलाई पराजित गरेकी हुन् ।

प्रतियोगितामा त्रिभुवन आर्मी क्लबकै सिन्दिरा जोशीले सात खेलमा जीत र एक खेलमा ‘ड्र’ निकाल्दै रजत पदक जित्न सफल भए । यस्तै, प्रदेश नं १ की खुश्बु थापाले छ खेलमा जीत र एक खेलमा ‘ड्र’ निकाल्दै कास्य पदक प्राप्त गर्न सफल भएको आयोजकले जनाएको छ ।

स्वर्ण पदक विजेता लोहनीले आठौँ राष्ट्रिय खेलकुद प्रतियोगितामा महिला क्लासिकतर्फको क्लासिकल इभेन्टमा सबै खेल जितेर स्वर्ण पदक विजेता बनेका थिए ।