काठमाडौं । टेस्लाले चीनमा आफ्नो मोडेल ३ र मोडेल वाई (Y) कारको मूल्य ९ प्रतिशतसम्मले घटाएको छ । कम्पनीले विश्वभर आफ्नो कारको मूल्य बढाउँदै लगेका बेला चीनमा भने उल्टो मूल्य घटाएको हो ।
कम्पनीले आफ्नो चिनियाँ वेबसाइटमा मूल्य घटाएको बिषय उल्लेख गरेको छ । टेक्सस आधारित कम्पनीको सेयर मूल्य भने ३.३ प्रतिशतले घटेर २०७.३६ अमेरिकी डलर पुगेको छ ।
मूल्य कटौतीले टेस्लाका प्रमुख कार्यकारी एलन मस्कको गत हप्ताको टिप्पणीलाई पनि पछ्याएको छ । उनले चीन र युरोपमा एक प्रकारको मन्दी चलिरहेको र टेस्लाले यो वर्ष आफ्नो गाडी डेलिभरी लक्ष्य गुमाउने टिप्पणी गरेका थिए ।
मस्कले गत हप्ता विश्लेषकहरूसँग हालको त्रैमासिकमा माग बलियो रहेको बताउँदै टेस्ला मन्दी-उत्थानशील हुने अपेक्षा गरेको बताएका थिए ।
'मूल्य कटौतीले सम्भावित मूल्य युद्धलाई रेखांकित गर्दछ जुन हामीले अगस्टदेखि जोड दिइरहेका छौं,' सीएमबीआईका विश्लेषक शि जीले भनेका छन् ।
सीएमबीआईका विश्लेषकहरूले गत हप्ता २०२३ मा विद्युतीय गाडी क्षेत्र थप प्रतिस्पर्धामा रहने चेतावनी दिएका थिए । यसले विद्युतीय र अन्य गाडीको बिक्री वृद्धि ५० प्रतिशत भन्दा तल झर्ने अपेक्षा गरिएको छ ।
