अघिल्ला सांसदले विकासको अनुभूति गराउन नसक्दा जनता समस्या सुनाउँछन् : जयप्रकाश ठाकुर

हाम्रा कुरा

प्रकाशित २०७९ कार्तिक ३० बुधबार

सप्तरी। सप्तरी निर्वाचन क्षेत्र नम्बर २ मा प्रतिनिधिसभातर्फ सत्तारूढ गठबन्धनका साझा उम्मेदवार जयप्रकाश ठाकुरले अघिल्ला सांसदले विकासको अनुभूति गराउन नसक्दा जनता समस्या सुनाइ रहेको बताएका छन्। उनले भने, 'घरदैलोमा जाँदा जनताले धेरै समस्याहरू सुनाउँछन्।'

उनले गएको ५ वर्षमा जनताको अपेक्षा अनुसार काम नभएकै कारण जनताले गुनासो गरिरहेको दोहोर्‍यए। "जनताले विकासको अनुभूति गरेको भए समस्या र गुनासो सुनाउने थिएनन्," उनले भने, "मलाई जनताले जिताउने छन् र म जनताबाट आएको समस्या समाधान गर्न प्रतिबद्ध छु।"

शुक्रवार जनताको घरदैलोमा जाँदा उनीहरू के भन्छन् ? भन्ने प्रश्नमा बितेको ५ वर्षमा शिक्षा, स्वास्थ्य र रोजगारको अवस्था झनै बिग्रिँदै गएको आम सर्वसाधारणले सुनाउने गरेको उनले बताए।

"अस्पताल छ तर, नि:शुल्क वितरण गर्ने औषधि छैन। सरकारी अस्पतालका चिकित्सकलाई निजी अस्पताल र क्लिनिकमा भ्याइन भ्याइ छ। बिरामी बोकेर धरान विराटनगर धाउनुपर्ने अवस्था छ, विद्यालय छ तर, गुणस्तरीय शिक्षा छैन। बेरोजगारीको समस्या विकराल छ। किसानले मल खादसम्म पाउन सकेको छैनन्। अनि के को विकास भएको हो ?" यस्ता प्रश्न जनताले सोध्ने गरेको ठाकुरले बताए।