जनकपुरधाम । पूर्वराजा ज्ञानेन्द्र शाह आज जनकपुरधामस्थित जानकी मन्दिरमा पुगेर विशेष पूजापाठ गरेका छन् । हिजो जनकपुरधाम आइपुगेका उनले आज शनिबार जानकी मन्दिर पुगेर पूजापाठ गरेका हुन् ।
जानकी मन्दिरमा पूर्वराजालाई स्वागतका लागि रातो कार्पेट ओछ्याइएको थियो । उनी मन्दिर पुगेपछि समर्थकले राजा आउ, देश बचाउको नारा लगाए ।
मन्दिरका महन्त रामतपेश्वर दास र सहायक महन्त राम रोसन दासले पूर्वराजा ज्ञानेन्द्रलाई जानकी मन्दिर भएको मायाको चिनो प्रदान गरेका छन् । पूजापाठ पश्चात उनी जनकपुरस्थित भीआईपी गेस्ट हाउस यात्री निवास पुगेका छन् ।
जनकपुर किन आएको विषयमा उनले कुनै प्रतिक्रिया दिन मानेनन् । उनी आज साँझ तिर समर्थकहरुसँग छलफल गर्ने स्रोतले जानकारी दिएको छ । पूर्व राजा शाहले शुक्रबार गंगा सागरमा दैनिक हुने महागंगा आरतीमा सहभागीतासमेत जनाएका थिए ।
विमानबाट आउने कार्यक्रम रहे पनि बिहीबार साँझ सडकमार्ग हुँदै जनकपुरधाम आएका पूर्व राजा शाह जनकपुरधाममा शुक्रबार दिनभर शुभेच्छुकहरुसँगको भेटघाटपछि साँझ गंगा आरतीमा सहभागी भएका हुन् ।
