पोखरा । अघिल्लो पटक क्वाटरफाइनलबाटै बाहिरिएको अमेरिकी क्लव बीवाइएससी पोखरामा जारी आहा ! रारा पोखरा गोल्डकपको उपाधि नजिक पुगेको छ ।
पोखरा रंगशालामा आज भएको दोस्रो सेमिफाइनल खेलमा चर्च ब्वाइज युनाइटेड क्लवलाई १-० गोलले पराजित गर्दै बीवाईएससी उपाधि नजिक पुगेको हो । कडा प्रतिस्पर्धात्मक खेलको पहिलो हाफको अतिरिक्त समयमा बीवाईएससीले अग्रता लिएको थियो ।
पहिलो हाफमा ३ मिनेट थपिएको इन्जुरी समय अर्थात खेलको ४६ औं मिनेटमा रोजिन प्रजापतिले गर्दै टिमलाई बीवाइएससीलाई अग्रता दिलाएका थिए । सोही गोल नै बीवाईएससीलाई उपाधि नजिक पुर्याउन निर्णायक बन्यो ।
खेलको ८३ औं मिनेटमा आशीष चौधरीले रातो कार्ड पाएर मैदानबाट बाहिरिएपछि चर्च ब्वाइज १० खेलाडीमा सीमित हुन पुगेको थियो । बल खोस्नेक्रममा डाइलो इराकागलाई लडाइदिएपछि रेफ्री प्रज्वल क्षेत्रीले चौधरीलाई रातो कार्ड दिएर मैदान बाहिर पठाएका थिए ।
उपाधिका लागि बीवाइएससीले अब संकटा क्लवसँग पुस २३ गते प्रतिस्पर्धा गर्नेछ । प्रतियोगिताको विजेताले १२ लाख र दोस्रो हुने टोलीले ६ लाख रुपैयाँ प्राप्त गर्ने आयोजक सहारा क्लवले जनाएको छ ।
