काठमाडौं । नवनियुक्त मन्त्रीहरूले शपथग्रहण गरेका छन् । आज राष्ट्रपति भवन शीतल निवासमा राष्ट्रपति विद्यादेवी भण्डारीबाट नवनियुक्त मन्त्रीहरूले शपथग्रहण गरेका हुन् ।
शपथ लिनेमा उपप्रधानमन्त्री तथा ऊर्जामन्त्री राजेन्द्र लिङ्देनसहित १२ मन्त्री र ३ राज्यमन्त्री रहेका छन् ।
एमालेबाट शपथ लिनेमा रक्षा मन्त्रालयमा हरि उप्रेती, परराष्ट्र मन्त्रालयमामा विमला राई पौडेल, स्वास्थ्यमा पदम गिरी, कृषिमा ज्वालाकुमारी साह, उद्योग वाणिज्य तथा आपूर्ति मन्त्रीमा दामोदर भण्डारी रहेका छन् ।
त्यस्तै माओवादी केन्द्रबाट सूचना तथा सञ्चारमा रेखा शर्मा, संस्कृति, पर्यटन तथा नागरिक उड्डयन सुदन किराँती, अमनलाल मोदी सङ्घीय मामिला तथा सामान्य प्रशासन मन्त्री बनेका छन् ।
राष्ट्रिय स्वतन्त्र पार्टीबाट श्रम तथा रोजगारमा डीपी अर्याल र शिशिर खनाल शिक्षा मन्त्री बनेका छन् । रास्वपाले डा. तोसिमा कार्कीलाई स्वास्थ्य राज्यमन्त्री बनाएको छ ।
यसै गरी राप्रपाले विक्रम पाण्डेलाई शहरी विकास र ध्रुवबहादुर प्रधान कानून मन्त्री बनाएको छ । दीपक सिंह ऊर्जा राज्यमन्त्री बनेका छन् ।
प्रधानमन्त्री पुष्पकमल दाहालको मन्त्री मण्डलमा एमालेले ८, माओवादी केन्द्रले प्रधानमन्त्रीसहित ५ मन्त्री, रास्वपा र राप्रपाले ३-३ मन्त्रालय र जनमतले एउटा मन्त्रालय पाएका छन् । माओवादी, रास्वपा र राप्रपाले १-१ राज्यमन्त्री पाएका छन् । यसअघि अन्य पहिलो चरणको मन्त्रिमण्डल विस्तार गरेका थिए ।
गत पुस १० गते प्रधानमन्त्रीमा नियुक्त भएका प्रचण्डले पुस ११ गते पद तथा गोपनीयताको शपथ लिएका थिए । सोही दिन उपप्रधानमन्त्री एवम् अर्थमन्त्रीमा विष्णु पौडेल, उपप्रधानमन्त्री एवम् भौतिक पूर्वाधार तथा यातायातमन्त्रीमा नारायणकाजी श्रेष्ठ र उपप्रधानमन्त्री एवम् गृहमन्त्रीमा रवि लामिछानेले पद तथा गोपनीयताको शपथ लिएका थिए ।
एमालेका चार र जनमत पार्टीका अब्दुल खानले पनि सोही दिन मन्त्री पदको शपथ लिएका थिए ।
