काठमाडौं । लघुकथा समाज नेपालले ‘सावित्री–केशर कथा सम्मान—२०७९’ कथाकार बाबा न्यौपाने (वामनप्रसाद न्यौपाने) लाई प्रदान गरेको छ । त्यस्तै समाजले ‘बाटुली–खिलध्वज लघुकथा सम्मान—२०७९’ लघुकथाकार कल्याण पन्तलाई प्रदान गरेको छ ।
दुवै सम्मानका साथ नगद राशि २१ हजार रुपैयाँको थैली पनि प्रदान गरियो । थैली पुरस्कार संस्थापकहरू हरि थापा र भैरवी थापाले प्रदान गरे ।
काठमाडौंमा सम्पन्न कार्यक्रमका प्रमुख अतिथि प्रा.डा. लक्ष्मणप्रसाद गौतमले सम्मानित व्यक्तित्वलाई सम्मानपत्र अर्पण गर्दै दुवै सर्जकहरूलाई सम्मानित गर्न पाउँदा खुशी लागेको बताए । उनले सम्मान अर्पणले आफू स्वयम् सम्मानित भएको उल्लेख गरे ।
अर्का अतिथि तथा समाजका सल्लाहकार साहित्यकार अशेष मल्लले लघुकथा समाजले समर्पण गर्ने सम्मानहरूका लागि चयन हुने व्यक्ति उत्कृष्ट हुने गरेको बताए ।
दुवै सम्मानका संस्थापकहरूका तर्फबाट साहित्यकार हरि थापाले आगामी दिनमा पनि समाजले हाम्रो होइन राम्रो कथाकारहरूको चयन गर्दै सम्मानित गर्ने विश्वास व्यक्त गरे ।
सो अवसरमा कथाकार बाबा न्यौपाने र लघुकथाकार कल्याण पन्तले आफूहरूलाई खुसी लागेको बताए ।
कार्यक्रममा समाजका सदस्य नवराज रिजालले दुवै सम्मानित स्रष्टाहरूको परिचय दिएका थिए भने समाजका अध्यक्ष गोपाल अश्क र सदस्य श्रीबाबु कार्कीले पनि बोलेका थिए ।
