अपांगताका लागि उदाहरणीय बन्दै ललितपुर महानगर [फोटोफिचरसहित]
हाम्रा कुरा
प्रकाशित २०७९ फागुन १७ बुधबार
1.3k
Shares
काठमाडौं । ललितपुर महानगरपालिकाका मेयर चिरिबाबु महर्जनले ललितपुर अपांगता भएकाहरुको सुविधाका लागि उदाहरणीय महानगरपालिका बन्ने दाबी गरेका छन् ।
१५ औं अन्तर्राष्ट्रिय ह्वीलचियर दिवसको अवसरमा महानगरको प्राङ्गणमा बुधबार भएको कार्यक्रममा बोल्दै मेयर महर्जनले अपांगता भएकाहरुका लागि भौतिक संरचना निर्माणमा ललितपुर सबैभन्दा अगाडि रहेर काम गरिरहेको दाबी गरेका हुन् ।
उनले पहुँचयुक्त भौतिक संरचना निर्माण भइरहेको भन्दै अपांगता भएकाहरुले ह्वीलचेयरबाटै आकाशे पुल प्रयोग गरेर आफैं बाटो काट्न सक्ने जानकारी दिँदै उक्त पुल बनाउन संघीय सरकारबाट स्वीकृतिका लागि पत्रसमेत पठाइसकेकाे बताए । उनले यो देशकै लागि पनि उदाहरणीय हुने जिकिर गरेका छन् ।
कार्यक्रममा बोल्दै अपांगता हक अधिकार अभियन्ता भोजराज श्रेष्ठले महानगरपालिकालाई अपांगता भएकाहरुलाई घर बाहिर निस्कन सहयोग हुने गरी व्यक्तिगत सहयोगी उपलब्ध गराउन आग्रह गरेका छन् ।
उनले अपांगता भएकाहरुलाई आफूले चाहेको स्थानमा जानका लागि सहज गराउन महानगरलाई कम्तीमा तीन जना पुरुष र तीन जना महिला व्यक्तिगत सहयोगी राख्न पनि आग्रह गरेका छन् ।
श्रेष्ठले आग्रह गरिरहँदा मेयर महर्जनले टाउको हल्लाएर स्वीकार गरेका थिए ।
यसअघि जावलाखेलदेखि शुरु भएको र्याली महानगरपालिकाको प्राङ्गणमा पुगेर कार्यक्रममा परिणत भएको थियो । र्यालीमा सहभागी अपांगता भएकाहरुले ह्वीलचेयरमा ‘पहुँचयुक्त भौतिक संरचना निर्माण गर’, ‘व्यक्तिगत सहयोगी सेवाको व्यवस्था गर’ लगायतका नाराहरु टाँसेका थिए ।
