-
-
-
-
झापा । पखालेर मैलो सफा चित्त पारी
सबैले गरौँ खेल्न होली तयारी ।
भुलौँ वैरता रङ्गमा लौ रमाऔँ
छ संस्कार जे त्यो सबैले समाऔँ ।१।
बनाएर लोला लुकी हान्नुभन्दा
धुलो रङ्ग खेल्दै गरौँ चित्त चङ्गा ।
भलो पर्व होली मजाले मनाऔँ
छ संस्कार जे त्यो सबैले समाऔँ ।२।
बजाएर बाजा मिलाएर लोली
युवा, वृद्ध, सारा झुमौँ चित्त खोली ।
गरी प्रेम वर्षा सबै नै रमाऔँ
छ संस्कार जे त्यो सबैले समाऔँ ।३।
सुरापान गर्दा कहाँ शान्ति मिल्छ
खुसी जिन्दगीको सबै नै सकिन्छ ।
त्यसैले सुधापानमा चित्त लाऔँ
छ संस्कार जे त्यो सबैले समाऔँ ।४।
हटाई तुवाँलो सफा चट्ट पारी
नयाँ रङ्गले नै धरा यो सिँगारी
भलो पर्व होली मनैमा सजाऔँ
छ संस्कार जे त्यो सबैले समाऔँ ।५।
छन्द: भुजङ्गप्रयात
परिश्रमी पाठशाला
