खोटाङ । खोटाङमा बसोबास गर्ने दाहाल समयुदायले चन्दा सङ्कलन गरेर आफ्नो कार्यालय भवन बनाएका छन् ।
सो समुदायले रु २४ लाख ४४२ खर्चमा दिक्तेल रुपाकोट मझुवागढी नगरपालिका–२ सोल्मास्थित गैरीगाउँमा पक्की कार्यालय भवन निर्माण गरेका हुन् ।
यसका लागि सोल्माका स्थानीय रामबहादुर दाहालले निःशुल्क उपलब्ध गराएको छ आना जग्गामा दाहाल कार्यालय भवन निर्माण गरिएको दाहाल प्रतिष्ठानका जिल्ला अध्यक्ष मिनकुमार दाहालले बताए । प्रतिष्ठानको कार्यालय भवन विसं २०७७ फागुन २३ गते शिलान्यास गरिएको थियो ।
कार्यालय भवन निर्माणका लागि जिल्ला तथा जिल्ला बाहिर विभिन्न स्थानमा बसोबास गर्दै आएका दुई सय ७१ दाहाल बन्धुबाट रु २६ लाख ४८ हजार नौ सय ७२ रकम सङ्कलन भएको जनाइएको छ ।
भवन निर्माणका लागि रु एक सयदेखि रु एक लाख ११ हजार एक सय ११ सम्म सहयोग प्राप्त भएको प्रतिष्ठानले जनाएको छ ।
नव निर्मित भवनको प्रतिष्ठानका केन्द्रीय सदस्य सीताराम दाहालले शनिबार शुभारम्भ गरे । सो अवसरमा भवन निर्माणका लागि आर्थिक सहयोग गर्ने दातालाई सम्मानसमेत गरिएको थियो ।
