सात महिना बित्दासमेत चिनियाँ राष्ट्रपतिले बुझेनन् राजदूत श्रेष्ठको ओहोदाको पत्र

हाम्रा कुरा

प्रकाशित २०७९ चैत ३ शुक्रबार

काठमाडौं । चिनियाँ राष्ट्रपति सी जिनपिङले नेपाली राजदूत विष्णुपुकार श्रेष्ठबाट चीन पुगेको सात महिना बितिसक्दा पनि उनको ओहोदाको पत्र अहिलेसम्म बुझेका छैनन् । ओहदाको पत्र नबुझेकोप्रति राष्ट्रिय एकता अभियान अभियानले चिन्ता जनाएको छ ।

प्रेस विज्ञप्ति जारी गर्दै अभियानले चीन र नेपाल बीचको बलियो र गहिरो सम्बन्धको पृष्ठभूमिमा यो ढिलाइ गम्भीर चिन्ताको विषय र निकै निराशाजनक रहेको उल्लेख गरेको छ ।

विज्ञप्तिमा भनिएको छ, ‘पारस्परिक सम्मान र सहयोगको जगमा निर्माण भएको चीनसँगको सम्बन्धलाई नेपालले सधैं ठूलो महत्त्व दिएको छ । यो सम्बन्ध अन्तर्राष्ट्रिय मञ्चमा एकअर्कालाई समर्थन सहित धेरै तरिकाले प्रकट भएको छ। त्यसैले चीनले कूटनीतिक प्रोटोकलको उचित प्रकृया पालना नगरेको हेर्नु चिन्ताको विषय हो ।’

चीनलाई नेपालसँगको सम्बन्धको महत्त्वको स्मरण गराउँदै एकता अभियान अभियानका अध्यक्ष विनय यादवले थप ढिलाइ नगरी नेपाली राजदूतको ओहोदाको पत्र बुझिने कुरा सुनिश्चित गर्न तुरुन्तै कदम चाल्न आग्राह गरे । उनले प्रमाण पत्र बुझ्न भएको ढिलाइले हाम्रा दुई राष्ट्रहरू बीचको मित्रताको गहिरो बन्धनलाई कमजोर बनाउने बताए ।

विज्ञप्तिमा थप भनिएको छ, ‘चीनले यस समस्यालाई सम्बोधन गर्न र हाम्रा देशहरूबीचको कूटनीतिक सम्बन्धलाई सुदृढ पार्न तत्काल र आवश्यक कदम चाल्नुपर्छ भन्ने हाम्रो दृढ विश्वास छ। नेपाल र चीनबीचको सम्बन्धलाई बलियो बनाउने पारस्परिक सम्मान र सहयोगको रक्षा गरिनुपर्छ र कूटनीतिक प्रोटोकल पालना नगर्दा यस सम्बन्धको अखण्डतालाई कमजोर बनाउँछ ।’