आईपीएलमा आज दुई खेलः दिल्ली र मुम्बईलाई खाता खोल्ने अवसर

हाम्रा कुरा

प्रकाशित २०७९ चैत २५ शनिबार

काठमाडौं । भारतमा जारी इन्डियन प्रिमियर लिग (आईपीएल) क्रिकेटमा आज दुई खेल हुँदैछन् । पहिलो खेलमा दिउँसो ३ः४५ बजे राजस्थान रोयल्स र दिल्ली क्यापिटल्स खेल्दैछन् । खेल गुवाहाटीमा हुँदैछ ।

दोस्रो खेलमा बेलुकी मुम्बई इन्डियन्स र चेन्नई सुपर किंग्स खेल्देछन् । आईपीएलको इतिहासमा सबैभन्दा सफल यी दुई टिम हुन् । मुम्बईले ५ तथा चेन्नईले ४ पटक उपाधि जितेको छ ।

खेल ७ः४५ बजे वान्खेडे मैदानमा शुरु हुनेछ ।

यी खेल जितेर दिल्ली र मुम्बईलाई खाता खोल्ने अवसर रहेको छ ।

शुक्रबार रातिको खेल
शुक्रबार रातिको खेलमा लखनउ सुपर जाइन्टस विजयी भएको छ । लखनउले घरेलु मैदानमा भएको खेलमा सनराइजर्स हैदराबादलाई ५ विकेटले पराजित गर्यो ।

१२२ रनको विजयी लक्ष्य लखनउले १६ ओभरमै ५ विकेट गुमाएर पूरा गर्यो । कप्तान लोकेश राहुलले ३५ तथा अलराउन्डर क्रुनाल पान्डेयाले ३४ रन बनाए ।

यसअघि पहिले ब्याटिङ गरेको हैदराबादले ८ विकेटको क्षतिमा १२१ रनमात्र बनायो । राहुल त्रिपाठीले ३४ तथा अनमोलप्रित सिंहले ३१ रन बनाए । कम योगफलमा रोक्ने क्रममा क्रुनालले ३ तथा अमित मिश्राले २ विकेट लिए ।

अंक तालिका
१० टिम सहभागी लिगमा लखनउ सुपर जाइन्टस ३ खेलबाट ४ अंकसहित शीर्ष स्थानमा रहेको छ । २ खेलबाट गुजरात टाइन्टान्स र पञ्जाब किंग्स ४ अंकसहित क्रमशः दोस्रो र तेस्रो स्थानमा छन् ।

समान २ खेलबाट २ अंकसहित कोलकाता नाइट राइडर्स, राजस्थान रोयल्स, चेन्नई स्पर किंग्स र रोयल च्यालेन्जर्स बैंगलोर क्रमशः चौथो, पाँचौं, छैटौं र सातौं स्थानमा रहेका छन् ।

अंकविहीन दिल्ली क्यापिटल्स, मुम्बई इन्डियन्स र सनराइजर्स हैदराबाद क्रमशः आठौं, नवौं र दशौं स्थानमा रहेका छन् ।