काठमाडौं । भारतमा जारी इन्डियन प्रिमियर लिग (आईपीएल) क्रिकेटमा मुम्बई इन्डियन्सले शुरुआती दुई खेल हारेपछि लगातार तेस्रो जित निकालेको छ ।
मुम्बईले सनराइजर्स हैदाराबादलाई राजीव गान्धी स्टेडियममा १४ रनले पराजित गरेको हो । मुम्बईले दिएको १९३ रनको लक्ष्य पछ्याएको हैदराबादले एक बल खेल्न बाँकी छँदै अलआउट हुँदै १७८ रन मात्र बनायो ।
हैदराबादका लागि ओपनर मंयक अग्रवालले ४१ बलमा ४ चौका र १ छक्काको सहयोगमा सर्वाधिक ४८ रन बनाए । हेनरिक केल्सनले १६ बलमा ४ चौका र २ छक्काको सहयोगमा ३६ रन बनाउँदा कप्तान एडेन माकरमले १७ बलमा २२ रन बनाए ।
मुम्बईका लागि जेसन बेहरानड्राफ्ट, राइली मेरिडेथ र पियुष चावलाले समान २–२ तथा अर्जुन तेन्दुलकर र क्यामरुन ग्रिनले समान १–१ विकेट लिए ।
अर्जुनले पहिलो विकेट लिएका हुन् । यसअघिको डेब्यु खेलमा भने उनले विकेट लिन सकेका थिएनन् । उनी सचिन तेन्दुलकरका छोरा हुन् ।
मुम्बईको इनिङ्स
खेलमा टस हारेर पहिले ब्याटिङ गरेको मुम्बईले २० ओभरमा ५ विकेट गुमाएर १९२ रन बनाएको थियो ।
क्यामरोन ग्रिनले ४० बलमा ६ चौका र २ छक्काको सहयोगमा अविजित रहँदै ६४ रन बनाए ।
ग्रिनले ३३ बलमा आफ्नो अर्धशतक पूरा गरेका थिए । ग्रिनको आईपीएलमा यो पहिलो अर्धशतक हो ।
ओपनर इशान किशनले ३१ बलमा ३ चौका र २ छक्काको सहयोगमा ३८ रन बनाउँदा तिलक बर्माले १७ बलमा २ चौका र ४ छक्काको सहयोगमा ३७ रन बनाए ।
कप्तान रोहित शर्माले १८ बलमा २८ रन बनाए ।
हैदराबादका लागि मार्को यानसनले २ विकेट लिए ।
अंक तालिका
राजस्थान रोयल्स ५ खेलबाट ८ अंकसहित शीर्ष स्थानमा छ । लखनउ सुपर जाइन्टस, चेन्नई सुपर किंग्स, गुजरात टाइटान्स, पञ्जाब किंग्स र मुम्बईको समान ६ अंक छ ।
कोलकाता नाइट राइडर्स, रोयल च्यालेन्जर्स बेंगलोर र सनराइजर्स हैदराबादको ४ अंक छ । अंकविहीन दिल्ली पुछारमा छ ।
आजको खेल
आज एउटामात्र खेल हुँदैछ । बेलुकी ७ः४५ बजे राजस्थान र लखनउ भिड्दै छन् ।
