काठमाडौं । भारतमा जारी इन्डियन प्रिमियर लिग (आईपीएल) टी–२० क्रिकेटमा गुजरात टाइटान्स लगातार दोस्रो उपाधि जितको प्रमुख दावेदार बनेको छ । पछिल्लो खेलमा राजस्थान रोयल्समाथि शानदार जितसहित गुजरातले शीर्ष स्थानलाई अझ मजबुद बनाएको हो ।
जयपुरमा भएको खेलमा पहिले ब्याटिङ गरेको राजस्थानले यो सिजनकै सबैभन्दा कम ११८ रन बनायो । १७.५ ओभरमात्र क्रिजमा टिकेको राजस्थानका लागि चार खेलाडीले मात्र दोहोरो स्कोर खडा गरेकामा कप्तान सन्जु सामसनले २० बलमा सर्वाधिक ३० रन बनाए ।
गुजरातका राशिद खानले ३, नुर अमदले २ तथा मोहम्मद शामी, हार्दिक पाण्डेया र जोश लिटिले १–१ विकेट लिए ।
जवाफमा गुजरातले १३.५ ओभरमै १ विकेटको क्षतिमा जित हासिल गर्यो । ऋद्धिमान साहाले ३४ बलमा अविजित रहँदै ४१ रन जोडे । कप्तान हार्दिक पाण्डेयाले १५ बलमा अविजित रहँदै ३९ रन बनाए । त्यस्तै शुबमन गिलले ३५ बलमा ३६ रन जोडे ।
अंक तालिका
१० खेलबाट १४ अंकसहित गुजरात टाइटान्स शीर्ष स्थानमा छ । १० खेलबाट लखनउ सुपर जाइन्टस र चेन्नई सुपर किंग्सको ११ अंक छ ।
राजस्थान रोयल्स, रोयल च्यालेन्जर्स बेंगलोर, मुम्बई इन्डियन्स र पञ्जाब किंग्सको समान १० अंक छ ।
कोलकाता नाइट राइडर्स १० खेलबाट ८ अंकसहित आठौं स्थानमा छ । सनराइजर्स हैदराबाद र पुछारको दिल्ली क्यापिटल्सको ६ अंक छ ।
आजका खेल
आज दुई खेल हुँदैछन् । दिउँसो ३ः४५ बजे चेन्नई र मुम्बई चेन्नईमा खेल्दैछन् । बेलुकी ७ः४५ बजे दिल्ली र बेंगलोर दिल्लीमा खेल्दैछन् ।
१६ औं संस्करणसम्म आइपुग्दा मुम्बईले सबैभन्दा बढी ५ उपाधि जितेको छ । चेन्नई सुपर किंग्सले ४, कोलकाता नाइट राइडर्सले २ तथा सनराइजर्स हैदराबाद, डेक्कन चार्जर्स, राजस्थान रोयल्स र गुजरात टाइटान्सले १–१ उपाधि जितेका छन् ।
