काठमाडौं । भारतमा जारी इन्डियन प्रिमियर लिग (आईपीएल) टी–२० क्रिकेटमा मुम्बई इन्डियन्स र गुजरात टाइटान्स भिडिरहेका छन् । जितका लागि गुजरातले २१९ रनको चुनौती पाएको छ ।
खेलमा टस हारेर पहिले ब्याटिङ गरेको मुम्बईले वाङ्खेडे मैदानमा ५ विकेटको क्षतिमा २१८ रन बनायो । सूर्यकुमार यादव चम्किँदा मुम्बईले सम्मानजनक योगफल तयार गरेको हो ।
यादवले जारी सिजनमा पहिलो शतक बनाउने क्रममा ४९ बलमा ६ छक्का र ११ चौकाको मद्धतले अविजित रहँदै १०३ रन बनाए ।
त्यस्तै इशान किशानले २० बलमा ३१, विष्णु विनोदले २० बलमा ३० तथा रोहित शर्माले १८ बलमा २९ रन बनाए । गुजरातका राशिद खानले ३० रन खर्चेर ४ विकेट लिए ।
प्लेअफमा पुग्नका लागि मुम्बईलाई यो खेल जित्नैपर्ने दबाब छ । यो खेल जित्दा भने गुजरात क्वालिफायर्समै पुग्ने देखिन्छ ।
पछिल्लो पाँच खेलको नतिजा हेर्ने हो भने मुम्बईले तीन खेल जित्दा दुईमा हार बेहोरेको छ । अन्तिम खेल भने मुम्बईले हारेको थियो ।
तर गुजरातले पाँचमध्ये एक खेलमात्र हारेको छ । गुजरात निकै नै फर्ममा देखिएको छ ।
अंक तालिका
११ खेलबाट १६ अंकसहित गुजरात टाइटान्स शीर्ष स्थानमा छ । १२ खेलबाट चेन्नई सुपर किंग्सको १५ अंक छ ।
१२ खेलबाट १२ अंकसहित राजस्थान रोयल्स तेस्रो स्थानमा रहेको छ । ११ खेलबाट १२ अंकसहित मुम्बई इन्डियन्स चौथो स्थानमा छ । लखनउ सुपर जाइन्टसको ११ खेलबाट ११ अंक छ । रोयल च्यालेन्जर्स बेंगलोर, कोलकाता नाइट राइडर्स र पञ्जाब किंग्सको समान १० अंक छ ।
सनराइजर्स हैदराबाद र दिल्ली क्यापिटल्सको ८ अंक छ ।
१६ औं संस्करणसम्म आइपुग्दा मुम्बईले सबैभन्दा बढी ५ उपाधि जितेको छ । चेन्नई सुपर किंग्सले ४, कोलकाता नाइट राइडर्सले २ तथा सनराइजर्स हैदराबाद, डेक्कन चार्जर्स, राजस्थान रोयल्स र गुजरात टाइटान्सले १–१ उपाधि जितेका छन् ।
