झापा । झापाको बुद्धशान्ति गाउँपालिका वडा नं ३ स्थित सय पत्री चौकमा सवारी दुर्घटना हुँदा एक बृद्धको ज्यान गएको छ । मेची राजमार्गको बुद्धशान्ति गाउँपालिका सडक खन्ड अन्तर्गत उत्तरबाट दक्षिणतर्फ जाँदै गरेको प्रदेश नं १–०१–०१४ प १७६४ को मोटरसाइकलले बाटो काट्दै गरेका पैदल यात्री स्थानीय वर्ष ६५ का बलबहादुर बस्नेतलाई ठक्कर दिएको थियो ।
मोटरसाइकलको ठक्कर लागेका बलबहादुरको टाउको र अनुहारमा चोट लागेको थियो । मोटरसाइकलले ठक्कर दिएपश्चात् अचेत अवस्थामा रहेका वृद्ध बलबहादुरलाई उपचारका लागि बिर्तामोडस्थित बीएण्डसी अस्पताल लैजाँदा दिउँसो करिब २ः३० बजे मृत्यु भएको जनाइएको छ ।
वृद्धलाई ठक्कर दिएर दुर्घटना गराउने मोटरसाइकल चालक गौरादह नगरपालिका वडा न ४ निवासी अन्दाजी वर्ष ३० का संदेश तुम्बापोलाई प्रहरीले नियन्त्रणमा लिएर थप अनुसन्धान गर्दै गरेको जिल्ला प्रहरी कार्यालय झापाले जनाएको छ ।
त्यसैगरी बुद्धशान्ति गाउँपालिका वडा न १ मा भएको मोटरसाइकल दुर्घटनामा परी एक विद्यार्थीको मृत्यु भएको छ । वडा नं १ स्थित शान्तिचोकमा मोटरसाइकलले ठक्कर दिएर घाइते भएकी एलिसा अधिकारीको गएराति मृत्यु भएको हो ।
उपचारको क्रममा उनको बिर्तामोडस्थित बिर्तासिटी हस्पिटलमा मृत्यु भएको प्रहरीले जनाएको छ । उनी स्थानीय सीता रमेश बहुमुखी क्याम्पसमा बीबीएस दोस्रो वर्षमा अध्ययनरत विद्यार्थी थिइन् ।
