-
-
-
-
काठमाडौँ । राजधानीमा मंगलबार जगन्नाथ रथयात्रा निकालिएको छ । कृष्ण चेतनाका लागि अन्तर्राष्ट्रिय समाज (इस्कोन) ले बूढानीलकण्ठस्थित राधाकृष्ण मन्दिरबाट जगन्नाथ, बलदेव, शुभद्राको मूर्तिलाई बाजागाजासहित लैनचौरमा ल्याएको थियो ।
त्यहाँ सिंगारिएको रथमा विराजमान गराएर श्रद्धालुहरूसहित भएर ती मूर्तिलाई नगर परिक्रमा गराइएको छ । विष्णुका पूर्ण कला रूप श्रीकृष्णलाई संस्कृतमा जगन्नाथ नामले पुकारिन्छ ।
जगन्नाथलाई भारतको चार धाममध्ये पवित्र तीर्थस्थलसमेत मानिन्छ ।
बद्रीनाथ उत्तर खण्डको हिमालय, रामेश्वरम दक्षिणको तमिलनाडू प्रान्त, द्वारिका पश्चिम प्रान्त गुजरात, जगन्नाथ पुरी पूर्वप्रान्त उडिसामा रहेको छ ।
हरेक वर्षको असार शुक्ल द्वितीयाको दिन भारतलगायत विश्वका धेरै ठाउँमा जगन्नाथको रथयात्रा गर्ने प्रचलन छ । यस वर्ष आयोजित रथयात्रा नेपालको २७ औँ हो।
