काठमाडौँ । नेपाली कांग्रेस सूचना, संचार तथा प्रचार विभागले नौ वटा निर्णय गरेको छ । प्रचार विभाग प्रमुख मीनबहादुर विश्वकर्माको अध्यक्षतामा केन्द्रीय कार्यालय वीपीनगरमा बसेको बैठकले विभिन्न नौ निर्णय गरेको हो ।
बैठकमा उपस्थित ३५ जना सदस्यहरुले आ–आफ्ना धारणा राखेका थिए ।
यी हुन् बैठकले गरेका निर्णयहरु (विज्ञप्तिसहित) नेपाली कांग्रेस सूचना, संचार तथा प्रचार विभागका प्रमुख श्री मीनबहादुर विश्वकर्माको अध्यक्षतामा नेपाली कांग्रेस केन्द्रीय कार्यालयमा आज वैठक वस्यो । बैठकमा उपस्थित ३५ जना सदस्यहरुले आ–आफ्ना धारणा राख्नु भएको थियो । बैठकले देहाय बमोजिम निर्णय गरेको छ ।
निर्णय
१. नेपाली कांग्रेसका सभापति मा. शेरबहादुर देउवालाई सम्पूर्ण विभागका प्रमुख लगायत सदस्यहरुका तर्फबाट धन्यवाद ज्ञापन गरियो ।
२. नेपाली कांग्रेसको सरकारले आजसम्म गरेका राम्रा कामको सन्देश जनसमक्ष पुर्याउने ।
३. पार्टीको नीति र नेतृत्वको सार्वजनिक स्थलमा विरोधका अभिव्यक्तिहरु नगर्न पार्टी संगठनका सबै तहका पदाधिकारी, सदस्यहरुलाई अनुरोध गर्ने ।
४. विभागको दैनिक गतिविधिलाई गतिशिलताका साथ प्रभावकारी रुपमा संचालन गर्न पदाधिकारी सहितको सचिवालय गठन गर्ने र विभागको कार्यालय नेपाली कांग्रेसको केन्द्रीय कार्यालय भवन, सानेपामा राख्ने ।
५. विभागका सदस्यहरुको विशिष्ट ज्ञान, क्षमता अनुसार कार्यविभाजन गर्ने उद्देश्यले व्यक्तिगत विवरण संकलन गर्ने ।
६. विभागको आफ्नै वेभसाईट र आधिकारिक समाजिक संजाल सञ्चालन गर्ने र हाल संचालित पार्टीको नाम, झण्डा र चुनाव चिन्ह राखी खोलिएका विभिन्न सामाजिक संजाल र अन्य पेजहरुलाई यस विभागमा आजका मितिले एक महिनाभित्र सम्पर्क गर्न आव्हान गर्ने र तत्पश्चात पनि सम्पर्कमा नआउनेलाई अनाधिकृत घोषित गरी कानुनी दायरामा ल्याउने ।
७. विभागको कामलाई प्रभावकारी बनाउन तपशिल बमोजिम निर्देशिका मस्यौदा समिति र कार्ययोजना तर्जुमा समिति गठन गर्ने र सो समितिले आजका मितिदेखि १५ दिनभित्र आफ्नो प्रतिवेदन विभागका प्रमुखलाई वुझाउने । निर्देशिका मस्यौदा समितिमा संयोजक श्री दिपकप्रसाद कुईकेल र सदस्यहरु श्री गोविन्द परियार, श्री गणेश के.सी., श्री लिला खनाल, श्री अनुषा नेपाल, श्री राजबहादुर गुरुङ्ग र श्री निमग हुमागाई रहने छन् भने कार्ययोजना तर्जुमा समितिमा समितिका संयोजक श्री गोपालकुमार झा र सदस्यहरु श्री तिलक राई, श्री उमिद वागचन, ई. हुकुम वुढा, श्री विष्णु तिम्सीना, ई. राघव गौतम र श्री रम्भा मिश्र रहेका छन् ।
८. नेपाली कांग्रेसका पूर्व सभापति एवं पूर्व प्रधानमन्त्री नेपाली राजनीतिका शिखर पुरुष गिरिजाप्रसाद कोइरालाको आज पर्न गएको शताव्दीऔं जन्म जयन्तीको अवसरमा उहाँप्रति हार्दिक श्रद्धासुमन व्यक्त गरियो ।
९. आज पर्न गएको गुरुपूर्णिमाको अवसरमा सम्पूर्ण गुरुज्यूहरुप्रति हार्दिक सम्मान व्यक्त गरियो ।
