काठमाडौँ । नेपाललाई ब्रिटिश साम्राज्यको अंग देखाउने तथा पूर्वप्रधानमन्त्री एवं एमाले अध्यक्ष केपी शर्मा ओलीको जन्मस्थान नेपालको नक्साबाट गायब गर्ने एमाले नेतृ रेखा झालाई कारबाही गर्न माग गरिएको छ । 

राष्ट्रिय एकता अभियानले  पूर्वसांसद तथा  एमालेकी नेत्रृ रेखा झाद्धारा नेपाललाई ब्रिटिश साम्राज्यको अंग देखाउने राष्ट्रघाती कार्य गरेको भन्दै घोर भर्त्सना गरेको छ। 

अभियानले झाले आफ्नो आधिकारिक फेसबुक खाताबाट नेपाललाई ब्रिटिश साम्राज्यको हिस्साको रूपमा झूटो चित्रण गर्न साझा गरेको नक्सालाई तुरुन्तै हटाई माफी माग्न पनि अनुरोध गरेको छ । 

अभियानले जारी गरेको विज्ञप्तिमा भनिएको छ, ‘नेपाल कुनै पनि साम्राज्यको दासत्व कहिल्यै स्वीकार नगरेको एक मात्र अविच्छिन स्वतन्त्र प्राचीन देश भएकोले आफ्नै समृद्ध र गौरवशाली इतिहास छ । हाम्रा हिन्दू पुर्खाहरूले नेपालको स्वतन्त्रता र सार्वभौमसत्ताको रक्षा गर्न वीरतापूर्वक पुस्तौँदेखि रगत बगाउँदै आएका छन् । नेपालको स्वाधीनतामा आँच पुर्याउने गलत सूचना प्रचार गर्नु हाम्रा पूर्वजहरुको बलिदानको अपमान हो।’

सन् १७९२ मा लर्ड कर्नवालिसको पालामा नेपाल ब्रिटिश साम्राज्यको एक हिस्सा रहेको देखाउने एमाले पूर्वसांसद झाद्वारा साझा गरिएको नक्सा ऐतिहासिक तथ्यको नियोजित तोडमडोेठ भएको बताइएको छ। 

‘साथै त्यस नक्सामार्फत पूर्वप्रधानमन्त्री सम्मानीय केपी शर्मा ओलीकै पुर्ख्यौली बसोवास रहेको ‘कोशी क्षेत्र’ नै नेपालको भाग नरहेको प्रस्तुत गरी हाम्रो देशको सीमाना नै बिगार्ने प्रत्यतन्न गरिएको हो हाम्रो ठहर छ’, अभियानका केन्द्रीय संयोजक विनय यादवले जारी गरेको विज्ञप्तिमा भनिएको छ, ‘यस्ता भ्रामक राष्ट्रघाती कार्यहरूले हाम्रो इतिहासलाई धोका दिने मात्र होइन, सम्माननीय ओलीज्युको राष्ट्रिय अखण्डताप्रतिको अटल अडानलाई समेत कमजोर तुत्याउँछ ।’

झासँग उनको देशद्रोही कार्यको लागि तुरुन्त माफी मागी नेपालको गौरवशाली इतिहासलाई कलंकित गर्ने कार्य कुन शक्तिको ईशारामा गरेको हो भन्ने प्रष्ट पार्न राष्ट्रिय एकता अभियानले आग्रहसमेत गरेको छ। 

यो विषयलाई गम्भीरतापूर्वक लिएर झामाथि कारबाही गर्न पनि पूर्वप्रधानमन्त्री तथा नेकपा एमालेका अध्यक्ष ओलीलाई आग्रह गरिएको छ । 

राष्ट्रिय एकता अभियान नेपालको सम्पदा, इतिहास र सार्वभौमसत्ता जोगाउन प्रतिबद्ध भएको र राष्ट्रको इतिहासलाई विकृत गर्ने कुनै पनि प्रयासलाई पर्दाफास गर्न र चुनौती दिन अभियान जारी राख्ने पनि विज्ञप्तिमा उल्लेख छ।