काठमाडौँ । नेपाली काँग्रेसका केन्द्रीय सदस्यले वर्षको एक महिनामात्र बिदा पाउने भएका छन् । काँग्रेसको केन्द्रीय समिति बैठकमा कार्यक्रमको प्रस्तावित वार्षिक खाका सार्वजनिक बोल्दै महामन्त्री गगनकुमार थापाले सो जानकारी दिएका हुन् । 

उनले वर्षको एक महिना केन्द्रीय सदस्यले बिदा पाउने र बाँकी समय केन्द्रीय सदस्यहरु कुनै न कुनै काममा व्यस्त रहने गरी खटिने बताएका छन् । 

काँग्रेसलाई चलायमान गर्ने क्रममा केन्द्रीय सदस्यहरु स्थानीय तहदेखि केन्द्रमा रहेर जिम्मेवारी बहन गर्ने छन् । 

लामो समयपछि केन्द्रीय सुमिति बैठक बस्दा पनि केन्द्रीय सदस्यहरु जिम्मेवारीविहीन छन् । 

त्यस्तै ४८ विभागहरु भएकामा २२ वटा विभाग थप प्रस्तावित गरिएकामा तिनीहरुलाई समेत चलायमान गरेर सबैलाई सशक्त भएर वर्षैभर ब्यस्त रहने कार्यक्रम महामन्त्री थापाले सार्वजनिक गरेका हुन् । 

विभागमा कम्तीमा पनि एक तिहाइ महिला हुनुपर्ने र कम्तीमा १५ प्रतिशत युवा र २० प्रतिशत विज्ञ हुनुपर्ने पनि नियम बनाइएको छ । 

नेता थापाले एक वर्षको क्यालेन्डर सुनाउने क्रममा केन्द्रीय कार्यसमिति बैठक हरेक दुई महिनामा कम्तीमा बसिहाल्ने र साउनमा बसेपछि अब असोजको पहिलो हप्तामा बस्ने नै र न्यूनतम दुई वटा बैठक काठमाडौँ बाहिर बस्ने सुनाएका छन् । 

उनले पार्टीको विधानमा भएका ४८ विभागमा २२ नयाँ विभाग थप्न आवश्यक भएकाले केही विभाग प्रस्ताव गर्ने र उक्त विभाग भदौ १५ सम्म तयार गर्ने पनि उनले बताए । 

उनले वर्षभरिको विवरण ६–६ महिनामा बुझाउने भन्ने रहेको गगनले बताए । 

समितिले पूर्णता पाउन नसकेकोले भदौ १५ भित्रै गठन गर्नुपर्ने उनले बताए । प्रशिक्षणको कार्यतालिकासमेत उनले सुनाएका छन् । 

भ्रातृ संस्थाहरुको बारेमा उनले प्रस्ताव सुनाएका छन् । 

उनले ८ लाख ६६ हजार क्रियाशील सदस्यहरुको कार्ड जिल्लाबाटै साउन मसान्त भित्रै प्रिन्ट गरेर दिने पनि समय तोकेको बताएका छन् । 

केही जिल्लामा यसको शुरुआत भइसकेको पनि उनले बताए । नवीकरण कार्यक्रम भदौ, असोज र कार्तिकमा गर्ने पनि उनले बताए । 

राष्ट्रिय अभियान साउन २० देखि आगामी असार ३१ गतेसम्म हुने बताएका छन् । यो अभियान अन्तर्गत ५ देखि ७ लाख क्रियाशील सदस्य थप्ने दाबीसमेत उनले गरेका छन् ।