काठमाडौँ । कुशल भुर्तेलको कीर्तिमानी बलिङसँगै नेपालले एसीसी इमर्जिङ टिम्स एसिया कप क्रिकेटको अन्तिम खेलमा यूएईलाई १५७ रनमा अलआउट गरेको छ ।
श्रीलंकाको पि सारा ओभल कोलोम्बोमा टस जितेर पहिले ब्याटिङ गरेको यूएई ४४ ओभरमा अलआउट हुँदै १५७ रनमा समेटियो । यूएईका लागि लभप्रित सिंहले ८२ बलमा ५२ रन बनाए ।
पाँच खेलाडीलेमात्र दोहोरो स्कोर खडा गरेको इनिङ्सलाई ध्वस्त पार्ने क्रममा नेपालका लागि कुशलले कीर्तिमानी बलिङ गरे । उनी एक्लैले ६ विकेट लिए । भुर्तेलले १० ओभरमा ४० रन खर्चिएर ६ विकेट लिएका हुन् ।
राष्ट्रिय टिमबाट भुर्तेलले एकै इनिङ्समा लिएको यो सर्वाधिक विकेट हो । श्याम ढकालले २ तथा कुशल मल्ल र पवन सर्राफले समान १–१ विकेट लिए ।
समूह बी मा रहेका नेपाल र यूएई ए समूह चरणबाट बाहिरिइसकेका छन् । नेपाल पहिलो खेलमा पाकिस्तान ए सँग ४ विकेट र दोस्रो खेलमा भारत ए सँग ९ विकेटले पराजित भएको थियो ।
यूएई भारतसँग ८ र पाकिस्तानसँग १८४ रनले पराजित भएको थियो । यूएईले दोस्रो रोजाइका खेलाडी इमर्जिङ टिम्स कपमा पठाएको हो ।
यस प्रतियोगितामा ८ टोलीको सहभागीता रहेको छ । सहभागी टोलीहरुलाई दुई समूहमा विभाजन गरिएको छ ।
हरेक समूहका शिर्ष दुई टोली सेमिफाइनलका लागि छानिने छन् । नेपालको समूहबाट भारत र पाकिस्तान छानिएका छन् । सेमिफाइनल खेल २१ जुलाईमा हुनेछ ।
सेमिफाइनलका दुई विजेता उपाधिका लागि भिड्ने छन् । फाइनल खेल २३ जुलाईमा रहेको छ ।
अर्को समूहबाट श्रीलंका र बंगलादेश सेमिफाइनलमा पुगेका छन् । अफगानिस्तान र ओमान भने बाहिरिएका छन् ।
