नुवाकोट  । अर्थमन्त्री डा. प्रकाशशरण महतले काठमाडौँसँग जोडिएको नुवाकोटमा विकासको ठूलो सम्भावना रहेको बताएका छन् । नेपाली कांग्रेस जिल्ला कार्यसमिति नुवाकोटले आयोजना गरेको शुभकामना आदान–प्रदान तीज विशेष कार्यक्रममा बोल्दै मन्त्री डा. महतले भने, ‘चीनसँग जोडिएको रसुवागढी धेरै टाढा छैन । व्यापार, पर्यटन, कृषि र उद्योग व्यवसायमा अथाह सम्भावना छ ।’

‘मन्त्री डा। महतले भन्नुभयो, ‘नुवाकोट खाद्यन्नमा आत्मनिर्भर छ । निर्यातका वस्तु धेरै छन् । कृषि उत्पाकत्व बढाउन यसपटकको बजेटमा उत्पादनमा अनुदानको व्यवस्था गरिएको छ । कागज बनाएर अनुदान खाने हो प्रवृत्ति अन्त्य भयो, अब उत्पादन देखाएर अनुदान पाउने प्रस्ताव गरेका छौं । कृषि मन्त्रालयलाई लागू गर्नुस् भनेका छौँ ।’

कृषि उत्पादन, फलफुल खेती, चिया कफीलगायत तमाम कृषि उत्पादनको नुवाकोटमा सम्भावना छ । त्यसमा पनि महिला दिदी बहिनीहरुले अगुवा गर्नुपर्छ । महिला दिदी बहिनीहरुकै नाममा हामीले औद्योगिक पार्कको पाँचखालमा घोषणा गरेका छौँ । त्यसको एक्सटेन्सन नुवाकोटमा पनि हुनुपर्ने मन्त्री डा. महतले बताए । 

बाटोको सञ्जाल निर्माणमा केही समयदेखि नुवाकोटमा अवरुद्ध छ । पहिला लगानी भएको थियो, बीचमा अबरुद्ध भयो । अहिले शुरु हुन थालेको छ । त्रिशुली–बालाजु सडकमा नेपाल सरकारले नै कार्यान्वयन गर्ने गरी बजेट परेको छ । 

गंगटेबाट समुन्द्रटार हुँदै भञ्ज्याङसम्म पुग्ने सडकमा यथेस्ट बजेट परेको छ । चाहे सूर्यगढी जाने बाटो होस् वा विभिन्न गाउँपालिका जाने बाटोमा बजेट परेको मन्त्री डा. महतले जानकारी दिए । 

उनले भने, 'सिमरा सिँचाइको नहर बिग्रेको अवस्था छ । ढिकुरेको पनि त्यस्तै अवस्था छ । त्यसलाई पनि हामीले बजेट राखेका छौँ । त्यो निर्माण भइसकेपछि १२ महिना सिचाइँको सुनिश्चिता हुनेछ । त्यसलाई समयमै ठेक्का लगाएर कार्यान्वयन गर्नुहोस् हामीले भनेका छौँ । तपाईहरुको पनि सहयोग चाहिएको  छ ।'  

एक नम्बर निर्वाचन क्षेत्रमा मात्र बजेट राखेछ भनेर कतिपयलाई लागेको छ । दुई नम्बरमा पनि केन्द्रको प्रशस्त बजेट छ । विदुर नगरपालिकामा ढललगायत निकासको ठूलो समस्या छ । त्यसका लागि ६५ करोड रुपैयाँको बजेट सुनिश्चित गरेको जानकारी दिए ।

उनले भने, ‘हामी साथीहरु पार्टीले गरेको कामबारे प्रचार गर्दैनन् । एकअर्कालाई सानो देखाउन सामाजिक सञ्जालमा हामी हत्त न पत्त टिप्पर्णी गरिहाल्छौँ । फलानोले जस पाउँछ कि भन्ने होइन यसको जस पार्टीले पाउँछ । त्यसपछि मात्र पार्टीले गरेपछि भनेर जनताले थाहा पाउँछन् । जो उम्मेदवार भए पनि त्यसपछि मात्र जनताले कांग्रेसलाई मत हाल्छन् । महिला दिदी बहिनीको अगुवाइमा हिजो, आज र भोलि गर्ने कामको प्रचार हुनुपर्यो ।’

‘छहरे–टोखा सुरुङ मार्ग लामो समयदेखि चर्चामा रह्यो । यसलाई निर्णायक मोडमा पुर्याउनुपर्छ भनेर मैले एक अर्ब बजेट राखेको छु, यद्यपि यो ५० अर्ब लाग्ने आयोजना हो । अहिलेको प्रयासले पुग्दैन, मन्त्री डा. महतले भने, ‘प्रधानमन्त्रीज्यूको टोली चीन भ्रमणमा जाँदैछ । हामीले यो सुरुङमार्ग निर्माणमा चीन सरकारको सहयोग मागेका छौँ । त्यो भयो भने यसले पूर्णता पाउँछ । यो निर्माणमा समय लाग्छ, त्यसैले धैर्यताको आवश्यकता छ ।’

शुभकामना आदान–प्रदान तीज विशेष कार्यक्रममा बोल्दै मन्त्री डा. महतले भने, ‘महिलालाई लागेको कुरा गीत र नृत्यमार्फत तीजमा मात्र अभिव्यक्त गर्ने चलन पुरानो भयो । लोकतन्त्रमा हामी हरेक दिन तीज मनाउँछौँ । ३६५ दिन नै हामीलाई लागेको कुरा भन्न पाउँछौँ । घर बाहिर होस् वा घरभित्र हामीले चाहेको पेशा व्यवसाय गर्न पाउँछौँ ।’

अहिले महिला दिदीबहिनीको युग भएको स्पष्ट पार्दै मन्त्री डा महतले भने, ‘महिला दिदीबहिनी सशक्त हुनुपर्ने पक्षमा नेपाली कांग्रेस छ । सशक्तिकरण र समावेशीको अभियान नेपाली कांग्रेसले शुरु गरेको हो । यो कुरा संविधानमा स्थापित भएको छ । अहिले एकतिहाई महिलाको सहभागीता छ, आउँदा दिनमा महिला सहभागीता बढ्दै जानेछ ।’

उनले अगाडि भने, ‘महिलाको तुलनामा पुरुषको ठूलो संख्या विदेशमा छ । विकास, सामाजिक परम्परा र संस्कृतिको संरक्षणको अगुवाई महिला दिदीबहिनीहरुले गरिरहेका छन् । पुरुषहरु अस्थिर हुन्छन्, महिलाहरु स्थरिताको प्रतिक हुन् । महिलाले जिम्मेवारी पाए भने पुरुषभन्दा गम्भीरताका साथ पूरा गर्छन् । राजनीतिक, आर्थिक र सामाजिक क्षेत्रको नेतृत्व तहमा महिला दिदीबहिनीहरु आउनुपर्छ । यसका लागि आत्मविश्वास बढाउनुपर्छ । महिलालाई अगाडि बढाउन सशक्तिकरणको अभियानले मद्दत गर्नेछ ।’