बैतडी । सुदूरपश्चिम प्रदेशका आन्तरिक मामिला तथा कानून मन्त्री शिवराज भट्टले वीपी कोइराला राष्ट्रभक्त र परिवर्तनकारी नेता भएको बताएका छन् ।
एकसय दसौँँ वीपी जयन्तीका अवसरमा पाटनमा तरुण दलले आज आयोजना गरेको प्रशिक्षण तथा वेभसाइट उद्घाटन कार्यक्रममा उनले भने, “वीपी कोइराला राष्ट्रभक्त र परिवर्तनकारी क्रान्तिकारी नेता हुनाका साथै राष्ट्रयताका लागि सधैँ लडिरहने व्यक्तित्व हुनुहुन्थ्यो ।”
राष्ट्रियता, स्वतन्त्रता र सामाजिक न्याय मानिसका आधारभूत चाहना हुन् भन्ने वीपीले युवालाई सङ्गठित गर्न नेविसङ्घ र तरुण दल स्थापना गर्नुभएको मन्त्री भट्टले उल्लेख गरे ।
पछिल्लो समय नेपाली कांग्रेसबारे गलत प्रचार भएको छ भन्दै उनले यसका लागि वैचारिक आन्दोलनको आवश्यकता रहेकामा जोड दिए ।
मन्त्री भट्टले भने, “कांग्रेसले गरेका राम्रा काम जनसमक्ष पुर्याउन जरुरी छ । यसका लागि वैचारिक आन्दोलनको आवश्यकता छ ।”
कांग्रेस संस्थापक नेता तथा प्रथम जननिर्वाचित प्रधानमन्त्री वीपी कोइरालाले नेपालमा प्रजातन्त्र स्थापनाका लागि कठोर सङ्घर्ष गरेका थिए ।
