काठमाडौँ । नेकपा एमाले अध्यक्ष केपी शर्मा ओली निकट कैलाश ढुङ्गेल अध्यक्ष पदमा निर्वाचित भएका छन् । ढुङ्गेल एमाले प्रथम बागमती प्रदेश कमिटीको अध्यक्ष पदमा निर्वाचित भएका हुन् ।
निर्वाचनमा पार्टी अध्यक्ष ओलीले अघोषित रूपमा ढुङ्गेललाई बोकेर हिँडेका थिए ।
गए राति सार्वजनिक मत परिणामअनुसार रामेछापका ढुङ्गेलले छ सय ९६ र प्रतिस्पर्धी मकवानपुरका कृष्णप्रसाद दाहालले चार सय ३९ मत प्राप्त गरेका छन् । गत निर्वाचनमा मकवानपुरबाट उम्मेदवारी पाउने बेलामा राप्रपा नेपालका कमल थापालाई सघाएर दाहाललाई अन्याय गरेका थिए भने ओलीले अहिले ढुङ्गेललाई जिताएर दाहाललाई फेरि लडाएका छन् ।
निर्वाचनमा उपाध्यक्षमा दावा दोर्जे लामा, सचिवमा नवराज सिलवाल, उपसचिवमा प्रेमकुमार महर्जन र भक्तकुमारी लामा निर्वाचित भएका छन्।
एमाले पार्टीको केन्द्रीय कार्यालय, च्यासलमा अन्तिम मत परिणाम सार्वजनिक भएपछि पार्टीका उपमहासचिव प्रदीपकुमार ज्ञवालीले विजयीलाई बधाई दिएका छन् ।
अधिवेशनमा कूल प्रतिनिधि एक हजार एक सय ७२ रहेकामा एक हजार एक सय ३१ ले मतदानमा भाग लिएका थिए ।
