अस्वभाविक कर वृद्धिको विरोधमा गौरादहका सबै वडा कार्यालयमा धर्ना

युवराज रेग्मी,

प्रकाशित २०८० असोज २४ बुधबार

झापा । झापाको गौरादह नगरपालिकाले भूमिकर लगायतका विभिन्न करहरु अस्वभाविक रुपमा वृद्धि गरेको विषयमा विरोध जनाउँदै नगरका नौ वटै वडा कार्यालयहरुमा स्थानीयले एकैसाथ एक घण्टे धर्ना दिएका छ्न् ।

गौरादह नगर अन्तर्गतको नेपाली कांग्रेस निकट विकास निर्माण समन्वय तथा खबरदारी समितिले जनाएअनुसार नगरका नौ वटै वडाहरुमा करवृद्धिको विरोध स्वरुप विभिन्न नारा लेखिएका प्ले कार्डसहित धर्ना दिन दिइएको हो ।

खबरदारी समितिले यसअघि पनि नगरपालिकाको कार्यालय तथा नगरका सबै वडा कार्यालयहरुमा अस्वभाविक रुपमा वृद्धि गरिएको करको दर घटाउन माग गर्दै ध्यानाकर्षण पत्र बुझाइसकेको थियो ।

ध्यानाकर्षण पत्र बुझाइएता पनि नगरले उक्त पत्रको कुनै सुनुवाइ नगरेकाले विरोध कार्यक्रमको दोस्रो चरण अनुरुप नगरका सबै वडा कार्यालयहरुमा धर्ना दिएइएको समितिले जनाएको छ ।

धर्ना कार्यक्रमको समन्वयका निम्ति नेपाली कांग्रेसको जिल्ला, प्रदेश र केन्द्रीय तहको नेतृत्वमा रहेका स्थानीय नेताहरुसहित आम सर्वसाधारणको बाक्लो उपस्थित रहेको खबरदारी समितिका सचिव ई.भानु आचार्यले जानकारी दिए ।