काठमाडौँ । बंगलादेशलाई पहिलो टेष्ट क्रिकेटमा पराजित गर्न न्यूजिल्याण्डले ३३२ रनको चुनौती पछ्याइरहेको छ । आज चौथो दिन बंगलादेशले ३३८ रन बनाएसँगै जितका लागि न्यूजिल्याण्डलाई ३३२ रनको चुनौती दिएको हो ।
सिलेटमा जारी खेलको पहिलो इनिङ्समा न्यूजिल्याण्डले सात रनको अग्रता लिएको भए पनि दोस्रो इनिङ्समा बंगलादेशले सुधारिएको प्रदर्शन गरेको छ ।
बंगलादेशका लागि कप्तान नजामुल हुसेन शान्टोले १९८ बलमा १०५ रन बनाए ।
चौथो विकेटका लागि ९८ रनको साझेदारी गर्ने क्रममा मुश्फिकर रहिमले ६७ रन बनाए ।
मेहन्दी हसन मिराजले अविजित रहँदै ५० रन बनाए । अजाज पटेलले ४ विकेट लिए ।
सिलेटमा मंगलबारदेखि शुरु भएको टेष्टमा घरेलु बंगलादेशले पहिले ब्याटिङ गर्दै ३१० रन बनायो । महमुद हसन जोएले ८६ रन बनाएको इनिङ्समा कप्तान नजमुल हुसेन शान्टो र मोमिनुल हकले समान ३७ रन बनाए ।
ग्लेन फिलिप्सले ४ तथा कायल जमाइसन र अजाज पटेलले समान २ विकेट लिए ।
जवाफमा न्यूजिल्याण्डले ३१७ रन बनायो । केन विलियमसनले सर्वाधिक १०४ रन बनाए । ग्लेन फिलिप्सले ४२ तथा ड्यारिल मिचेलले ४१ रन बनाए । बंगलादेशका तैजुल इस्लामले ४ तथा मोमिनुल हकले ३ विकेट लिए ।
३३२ रनको चुनौती लिएर मैदानमा उत्रेको न्यूजिल्याण्डले खाता नखोल्दै पहिलो विकेट गुमाएको थियो ।
भारतमा सम्पन्न एक दिवसीय विश्वकपको सेमिफाइनलसम्म पुगेको न्यूजिल्याण्ड विश्वकपपछि सिधै बंगलादेश गएको हो । बंगलादेश भने सेमिफाइनलसम्म पुग्न पाएन ।
न्यूजिल्याण्डले बंगलादेशसँग दुई टेष्टको श्रृंखला खेलिरहेको हो ।
