काठमाडौँ । नेपाली कांग्रेसको महासमिति बैठक बस्नका लागि निकै नै सकस भएको छ । तीन पटक मिति तय गरेर पनि बस्न नसकेको बैठक अब चौथो तिथिमा गएर रोकिएको छ । 

सो तिथिअनुसार बैठक फागुन ७ देखि १० गतेसम्म हुनेछ । यद्यपि कांग्रेसको विगतको मिति सार्ने बानीलाई हेर्ने हो भने यो मिति पनि नसर्ला भन्ने ग्यारेन्टी छैन । कांग्रेसमा लागेको बानी कहिँ नजाने भनेझैँ मिति सार्नलाई कुनै तिथि कुर्नै पर्दैन । 

त्यसो त अघिल्लो साता नै महासमिति सार्ने चर्चा भइरहेको थियो । जाडोे मौसमलेसमेत यो महासमिति बैठकलाई रुचाएको थिएन । 

त्यसपछि त्यसमा पनि थपियो राष्ट्रिय सभाको निर्वाचन । सहमहामन्त्री जीवन परियारका अनुसार पहिलेदेखि नै सार्ने हल्ला भइरहेको थियो । राष्ट्रिय सभामा २० सांसद ल्याउनु पर्ने हुनाले पनि पटक पटक बैठक बस्नुपर्ने, उम्मेदवार तय गर्नुपर्ने भएकाले पनि यो बैठक सार्नुपरेको हो । 

सभापति शेरबहादुर देउवाले नरुचाएको जाडोलाई राष्ट्रिय सभाको निर्वाचनले बहाना बनाइदियो । 

यसले गर्दा आफ्ना निकटस्थलाई उम्मेदवार बनाउन थप खेल्ने अवसर मिलेको छ । 

विभिन्न आन्तरिक छलफलका क्रममा भने सभापति देउवाले आफूले महासमिति बैठक सार्न नखोजेको बताउने गरेका थिए । यो आधारमा उनले अरुलाई देखाएर समय सारेको बुझिन्छ । तर संस्थापन पक्षका एक नेताले भने सभापतिले नचाहेर कहिल्यै पनि बैठक नसर्ने बताए । 

पटक पटक विभिन्न बहानामा सरिसकेको छ । अहिले आएर लामो समयका लागि बैठक सरेको हो । 

संस्थापन इतर पक्षले भने समयमै हुनुपर्छ भनिरहेको भए पनि सभापतिको हठका अगाडि कसैको केही लाग्दैन भन्ने फेरि पनि स्पष्ट भएको छ । 

यसअघि मंसिर १३ देखि १५ गतेसम्म गर्ने भनिएको बैठक दुई साता पर धकेलिएर मंसिर २९ देखि पुस २ गतेसम्म सञ्चालन गर्ने निर्णय गरेको थियोे । 

त्यसपछि पुस १६ देखि १९ सम्म धकेलिएको थियो । अहिले त दुई महिना पर धकेलियो । 

शुरुआती चरणमा हल नभएको कारण तथा त्यसपछि जाजरकोट भूकम्पका कारण बैठक सरेको थियो । त्यसपछिको बैठक कुनै बहाना नगरी सारिएको थियो । 

कस्तो छ महासमितिको तयारी ?
अब बैठक नै लामो समयका लागि सरेपछि तयारी फेरि सुस्तियो भन्दा फरक पर्दैन । तर अझै पनि दुई दर्जन क्षेत्रमा महासमिति प्रतिनिधि चयन हुन नै बाँकी छ । 

यद्यपि निर्वाचन समिति सचिव अधिवक्ता जगन्नाथ श्रेष्ठका अनुसार सबै क्षेत्रलाई मंसिर २० गतेभित्रै निर्वाचन गरेर महासमिति प्रतिनिधिको नामावली दिन भनिएको थियो । 

त्यसैगरी केन्द्रको तयारी पनि तीव्र रुपमा भइरहेको पार्टी मुख्यालयका सचिव प्रकाश शर्माले जानकारी दिए पनि अब समय फेरि लम्बिएको छ । 

देशभरबाट महासमिति बैठकका लागि अढाई हजार महासमिति सदस्यहरु काठमाडौँ आउने छन् । 

महाधिवेशनपछिको शक्तिशाली बैठक हुने भएकाले पनि यसका लागि तँछाडमछाड हुनु स्वभाविकै हो । 

यो बैठकले केन्द्रीय कार्यसमितिको निर्वाचन बाहेक महाधिवेशनले गर्ने सबै कार्यहरू गर्न सक्ने वैधानिक व्यवस्था भएकाले पनि यसको महत्व निकै छ । 

यही बैठकले पार्टीको राजनीतिक कार्यदिशा तय गर्नेदेखि विधानसमेत फेरबदल गर्न सक्ने हैसियत राख्छ । त्यसैले पनि संस्थापनले यो बैठकलाई अलिअलि गरी पछाडि धकेलेको आरोप संस्थापन इतर पक्षले लगाउने गरेको छ ।