काठमाडौँ । न्यूजिल्याण्डका कीर्तिमानी अलराउन्डर रचिन रविन्द्रले इन्डियन प्रिमियर लिग (आईपीएल) मा चेन्नई सुपर किंग्सबाट खेल्ने भएका छन् ।
मंगलबार यूएईको दुबईमा भएको खेलाडी अक्सनमा चेन्नईले रविन्द्रलाई एक करोड ८० लाख भारुमा किनेको हो । न्यूनतम ५० लाख भारु मूल्य रहेका रविन्द्रलाई दिल्ली क्यापिटल्स, पञ्जाव किंग्सले चासो देखाए पनि अन्ततः चेन्नईले बाजी मारेको थियो ।
भारतीयमूलका रविन्द्रले हालै सम्पन्न एक दिवसीय विश्वकप क्रिकेटमा शानदार प्रदर्शन गरेर सबैलाई प्रभावित पारेका थिए ।
त्यस्तै जारी खेलाडी अक्सनमा चेन्नईले भारतीय बलर सार्दुल ठाकुरलाई ४ करोडमा किनेको छ । त्यस्तै अफगानिस्तानका अजमातुल्लाह ओमरजाईलाई गुजरात टाइटन्सले ५० लाख भारुमा किनेको छ ।
त्यसैगरी सनराइजर्स हैदराबादले श्रीलंकाका वानिन्दु हसरंगालाई १.५ करोड भारुमा किनेको छ भने विश्वकपमा शानदार प्रदर्शन गरेर अस्ट्रेलियालाई विश्वकप जिताएका ट्राभिस हेडलाई सनराइजर्स हैदरावादले ६.८ करोड भारुमा किनेको छ ।
त्यस्तै इङ्गल्याण्डका विस्फोटक ब्याट्सम्यान ह्यारी ब्रुकलाई दिल्ली क्यापिटल्सले ४ करोड भारुमा किनेको छ भने वेस्टइन्डिजका रोभमन पावेललाई ५.४ करोडमा राजस्थान रोयल्सले किनेको छ ।
