काठमाडौँ । सत्तारुढ प्रमुख घटक नेपाली कांग्रेसले बालकुमारी घटनामा छानबिनका लागि उच्चस्तरीय न्यायिक समिति गठन गर्न सरकारसँग माग गरेको छ । 

आइतबार पार्टी केन्द्रीय कार्यसमिति बैठकको निर्णय सार्वजनिक गर्दै पार्टीका प्रचार विभाग प्रमुख मीन विश्वकर्माले दुई जना युवाको ज्यान जाने गरी भएको सो घटनालाई गम्भीरपूर्वक लिई सरकारले त्यसको सत्यतथ्य पत्ता लगाउन सो समिति तत्काल गठन गर्नुपर्ने माग गरिएको बताएका हुन् । 

सो घटनाको सत्यतथ्य पत्ता लगाई दोषीलाई कारबाही गर्नका लागि पनि न्यायिक समिति आवश्यक भएकाले त्यसलाई तत्काल गठन गर्न पार्टी केन्द्रीय कार्यसमिति बैठकले सरकारसँग माग गरेको पनि प्रचार विभाग प्रमुख विश्वकर्माले बताए । 

त्यसैगरी बैठकले सो घटनामा परी ज्यान गुमाएकाका परिवारका एक जना सदस्यलाई उचित रोजगारीको व्यवस्था तत्काल गर्न पनि सरकारलाई सचेत गराएको छ । 

मृतकका परिवारलाई उचित क्षतिपूर्ति र घाइतेहरुको निःशुल्क उपचारको व्यवस्था गर्न पनि सरकारलाई भनिएको कांग्रेसले जनाएको छ ।

प्रचार विभाग प्रमुख विश्वकर्माले भने, ‘२०८० साल पौष १३ गते ललितपुरको बालकुमारीस्थित इपिएस कार्यालय क्षेत्रमा वैदेशिक रोजगारीका लागि इपिएस परीक्षा दिन पाऊँ भन्ने माग गर्ने प्रर्दशनकारी र सुरक्षाकर्मीबीच भएको झडपमा दुई जना युवाको ज्यानु अत्यन्तै दुखद् घटना हो । यस घटनाले हामी सबैलाई मर्याहत तुल्याएको छ । तसर्थ सरकारले यो घटनालाई गम्भिरताका साथ लिई देहायका कार्य तत्काल गर्न सरकार गम्भिर ध्यानाकर्षण गर्ने । १. उच्चस्तरीय न्यायिक छानविन समितिको गठन गरी घटनाको सत्यतथ्य पत्ता लगाई दोषीलाई कानुनी कारबाही गर्ने । २. रोजगारीकै लागि विदेश जाने प्रक्रिया सम्बन्धि विवादबाट उत्पन्न आन्दोलनमा ज्यान गुमाएका परिवारका कम्तिमा एक जनालाई स्वदेशमै उचित रोजगारी प्रदान गर्नुपर्ने । ३. मृतकका परिवारलाई उचित क्षतिपूर्ति उपलब्ध गराउनुपर्ने, ४. घाइतेको निःशुल्क उपचार गर्नुपर्ने । ५. आगामी दिनमा यस्ता घटना दोहोरिन नदिन सरकारले विशेष नीति अवलम्वन गर्नुपर्ने । ’

कांग्रेसले त्यस्ता घटना आगामी दिन दोहोरिन नदिन विशेष नीति अवलम्वन गर्न पनि सरकारको ध्यानाकर्षण गराएको छ ।