'हनी ट्र्याप'मा पारेर पुरुषलाई ठगी गर्ने तीन युवा पक्राउ

हाम्रा कुरा

प्रकाशित २०८० पुष १८ बुधबार

पोखरा । जिल्ला प्रहरी कार्यालय कास्कीले नक्कली फेसबुक आइडी बनाएर ठगी ‘हनी ट्र्याप’ गरेको आरोपमा तीन जनालाई पक्राउ गरेको छ ।

पक्राउ पर्नेमा पोखरा महानगरपालिका वडा नं. २९ तालचोकका २२ वर्षका अनुराग घिमिरे, चितवन रत्ननगर नगरपालिका वडा नं. १३ का २० वर्षीय प्रवेश रिमाल र लहान नगरपालिका वडा नं. १ का २१ वर्षीय युनिक सिंह छन् ।

उनीहरुलाई चितवन प्रहरीको सहयोगमा पक्राउ गरेर पोखरा ल्याइ अनुसन्धान प्रक्रिया अघि बढाइएको कास्की प्रहरीका प्रवक्ता, प्रहरी नायव उपरीक्षक (डीएसपी) श्रवणकुमार विकले जानकारी दिए ।

उनीहरुले केटीको नाममा फेसबुक आइडी बनाएर पुरुषहरुलाई हनी ट्र्यापमा पारेर गठी गर्दै आएको डीएसपी विकले बताए ।

उनका अनुुसार पक्राउ परेकाहरुले फेसबुकमा सुरुमा साथी बनाउने, फोन गर्ने र त्यसपछि अश्लील भिडियोहरू देखाउने तथा स्क्रिन रेकर्ड गर्ने गरेका थिए ।

सोही रेकर्ड भएको स्क्रिनलाई उनीहरुले सामाजिक सञ्जालमा पोस्ट गरिदिन्छु भनेर डर धम्की दिएर पैसा असुल्ने गरेको खुलेको डीएसपी विकले बताए ।

पक्राउ परेका तीनैजनाविरुद्ध आपराधिक विश्वासघात तथा आपराधिक लाभ (एक्सर्सन) सम्बन्धी मुद्दामा अदालतबाट अनुमति लिएर अनुसन्धान प्रक्रिया अघि बढाइएको उनले बताए ।