अठार लाख ४३ हजार नक्कली नेपाली नोटसहित सन्दिप यादव पक्राउ

प्रिमेश शिवाकोटी,

प्रकाशित २०८० पुष १९ बिहिबार

रौतहट । रौतहट प्रहरीले नक्कली नेपाली नोटसहित एक युवकलाई पक्राउ गरेको छ । जिल्लाको देवाही गोनाहि नगरपालिका वडा नं ८ पटेल चौक नजिकबाट प्रहरीको टोलीले एक हजार दरको नोट थान १८४३ अर्थात् १८ लाख ४३ हजार नगदसहित पक्राउ गरेको हो ।

गुजरा नगरपालिका वडा नं ५ हरिहरपुरका २५ वर्षका सन्दिप यादवलाई प्रहरीले पक्राउ गरेको हो । नक्कली नोटसहित यादवको साथबाट विभिन्न बैंकको एटीएम भिसा कार्ड ५ थान, चेक ३ थान १६ लाख ६५ हजार उल्लेख भएको र मोबाइल एक थान बरामद भएको जिल्ला प्रहरी कार्यालय रौतहटले जनाएको छ ।

प्रहरीका अनुसार यसअघि पनि गरुडा नगरपालिका वडा नं ५ स्थित शिवनगर मेलाबाट गएको असार २१ गते १ सय दरको ४ थान नक्कली नोट सहित ४ जना, गएको कार्तिक १० गते गरुडा नगरपालिका ४ स्थितबाट एक हजार दरको ७ थान नक्कली नोटसहित ३ जना र गएको मंसिर ३० गते चन्द्रपुर नगरपालिका वडा नंं १० बालचनपुरबाट एक हजार दरको नोट २० थान सहित १ जनालाई प्रहरीले पक्राउ गरेको जिल्ला प्रहरी कार्यालय रौतहटकी प्रहरी नायव उपरीक्षक तथा सूचना अधिकारी एलिजा गिरीले जानकारी दिइन् ।