काठमाडौँ । उपप्रधान एवं रक्षा मन्त्री पूर्णबहादुर खड्काले ज्योतिष विद्यालाई नयाँ प्रविधि र पद्धतिसँग आबद्ध गर्दै विश्वभर प्रचारप्रसार गर्नुपर्ने आवश्यकता रहेको बताएका छन् ।
मङ्गलवार काठमाडौँमा आयोजित नेपाल ज्योतिष परिषद्को २६ औँ वार्षिकोत्सवलाई सम्बोधन गर्दै उनले यस्तो बताएका हुन् । उनले ज्योतिष विद्या प्रमाणित र वैज्ञानिक विद्या भएको बताए ।
उनले ज्योतिष विद्यालाई यदाकदा हचुवाको रूपमा अभ्यास गर्ने र जीविकोपार्जनको माध्यम मात्र बनाउने देखिएको भन्दै यस भन्दा माथि उठेर तथ्य र प्रमाणमा आधारित वैज्ञानिक र अनुसन्धानमूलक विद्याको रूपमा विकास गर्न आवश्यक रहेको बताए ।
उनले भने, ‘ज्योतिष विद्या प्रमाणित र वैज्ञानिक विद्या हो । समयको परिवर्तनसँगै हाम्रो परम्परागत शास्त्रीय ज्योतिष विद्यालाई अब नयाँ प्रविधि र पद्धतिसँग आबद्ध गर्दै विश्वभर यसको प्रचारप्रसार गर्नुपर्छ । ज्योतिष विद्यालाई यदाकदा हचुवाको रूपमा अभ्यास गर्ने, यसलाई जीविकोपार्जनको माध्यम मात्र बनाउने देखिएको केही सङ्केत र प्रश्नमाथि उठेर यसलाई तथ्य र प्रमाणमा आधारित वैज्ञानिक र अनुसन्धानमूलक विद्याको रूपमा विकास गर्न आवश्यक छ ।’
