उपत्यकामा यो वर्षकै सबैभन्दा चिसो, दिनानुदिन बन्दै रेकर्ड
हाम्रा कुरा
प्रकाशित २०८० माघ १४ आइतबार
708
Shares
तस्बिर – मलंगवा ।
काठमाडौँ । पछिल्ला केही दिनदेखि निरन्तर काठमाडौँ उपत्यकाको चिसो बढ्दै गएको छ । यो क्रम अझै केही दिन रहन सक्ने देखिएको छ ।
बिहीबार र शुक्रबार ३ डिग्री रहेकामा शनिबार झरेर २.५ डिग्री सेल्सियसमा पुगेको तापक्रम आइतबार २.१ डिग्रीमा झरेको छ ।
मौसम पूर्वानुमान महाशाखाकी मौसमविद् प्रतिभा मानन्धरका अनुसार यो क्रम अझै निरन्तर चलिरहन सक्नेछ । यद्यपि यसै भन्न नसकिने उनले बताइन् ।
सामान्यतया फागुनको पहिलो सातासम्म चिसो नै रहने छ । फागुन लागेपछि गर्मी बढ्दै जानेछ ।
अहिले घटेको तापक्रम यसअघिका वर्षहरुको भन्दा कम नभए पनि अहिलेका लागि चिसो बढेको मात्र हो । यस अर्थमा पनि अझै तीन साता बालबालिका र वृद्धवृद्धा, दमका रोगी लगायतले बच्नुपर्नेछ ।
हाल नेपालमा पश्चिमी वायुको आंशिक प्रभाव रहेका बेलामा वर्षा हुन नसक्दा चिसो झन् बढेको हो । घाम पनि हल्का लागेको छ । तराई क्षेत्रमा त घामसमेत देख्न पाइएको छैन । तराई भेगमा हुस्सु र कुहिरोका कारण हवाइ यात्रा कठिन भइरहेको छ । हिमाली केही क्षेत्रमा हिमपात भएको छ ।
मुलुकभरमै चिसो बढेको छ । तापक्रम भने घटबढ भइरहेको छ । जुम्लामा माइनस ४.९, दिपायलमा २.६, डडेलधुरामा ३.३, वीरेन्द्रनगरमा ३.३ डिग्री मापन गरिएको छ ।
सिमरामा २.५, विराटनगरमा ३, जनकपुरमा ५.२, पोखरामा ६, भैरहवामा ६.६ तथा धनगढीमा न्यूनतम तापक्रम ७.८ डिग्री रहेको छ ।
महाशाखाका अनुसार काठमाडौँमा सन् १९७९ जनवरी ११ तारिखमा माइनस ३.५ डिग्री सेल्सियस नै अहिलेसम्मको सबैभन्दा बढी चिसो हो ।
